Eyþór Ingi Jónsson, organisti í Akureyrarkirkju og kórstjóri með meiru, sér ekki fram á rólega tíma. Í kvöld leikur hann á tónleikum í Hofi með Elvý Guðnýju Hreinsdóttur, sambýliskonu sinni, og verða það fjórðu tónleikarnir af alls 28 fram að jólum. Giggin eru af ýmsu tagi með ólíkum hópum og undir ýmsum formerkjum. Meðal annars er hafin tónleikaröð þar sem organistinn Eyþór leikur sér með allt stafrófið.
Akureyri vikublað ákvað að kynna sér betur hvað keyrði slíka athafnasemi áfram.
„Ég veit það ekki,“ svaraði hann. „Hins vegar hef ég verið spurður hvort ég verði ekki moldríkur af þessu tónleikahaldi öllu. Það er nú af og frá, ég fæ ekki krónu fyrir neitt af þessu nema e.t.v. nokkra aura ef aðsókn að tónleikum okkar Elvýjar verður góð. Yfirleitt tapa ég á tónleikahaldi mínu, ætli það sé ekki aðallega hugsjónin og þörf fyrir listræna tjáningu sem ræður ferðinni.“
Ólíkir straumar blandast saman
Eitt af flaggskipum dagskrárinnar er tónleikaröð með Hymnodiu þar sem ýmsir kraftar slást í för. Eyþór stjórnar Hymnodiu og má nefna sem dæmi að Skálmöld, Pálmi Gunn og Ragnheiður Gröndal munu koma fram á tónleikum með kórnum á næstu vikum. Eyþór hefur áður lýst því í opnuviðtali við Akureyri vikublað að hann geri ekki upp á milli tónlistarstefna. Um samstarf Hymnodiu og rokkhljómsveitarinnar Skálmaldar segir hann að stundum þegar ólíkir skólar mætist, t.d. þegar sinfóníuhljómsveit komi fram með popphljómsveit séu einkum strengjasveitirnar meira til uppfyllingar. „En þetta verður miklu meira en það. Þarna mætast tvær tónlistarstefnur og verður ekkert slegið af.“
Kór sem fer ótroðnar slóðir
Tónleikaröðin sem Eyþór Ingi stendur að á næstunni verður flutt um víðan völl, allt frá litlum stöðum úti á landi og að Hörpunni í Reykjavík. Eyþór segir að fjöllistaefnisskrá Hymnodiu verði alls flutt níu sinnum. Kórinn sé ávallt til í ný og ný tækifæri og það kunni að skýra hversu eftirsótt hefur þótt að starfa með honum.
Hymnodia var stofnuð árið 2003, þá voru söngvararnir 8, núna eru þeir 18. Fyrstu árin kom kórinn fram á 3-4 tónleikum á ári, í ár kemur hann fram á um 30 tónleikum, syngjandi á milli 70 og 80 mismunandi lög. Einn af hápunktum starfsins í ár er jólaplata, önnur plata kórsins, nefnist hún Þar ljós inn skein. Á henni flytur kórinn, ásamt Láru Sóleyju Jóhannsdóttur fiðluleikara, Hjörleifi Erni Jónssyni slagverksleikara og Eyþór Inga harmóníumleikara 25 jólalög og er diskurinn í anda jólatónleika kórsins undanfarin ár.
Hvorki kórfélagar né stjórnandi þiggja laun fyrir vinnu sína í Hymnodiu. Öll innkoma fer beint í næsta verkefni. Allur kórinn tekur sameiginlega stærri ákvarðanir að sögn Eyþórs og engin stjórn er í kórnum.
Langt afmælisverkefni
En hvað með þetta stafrófsdæmi?
„Já, ég verð fertugur í lok nóvember og langaði að búa til langt verkefni þar sem ég spilaði allt stafrófið á orgel, einn staf í einu þannig að þetta yrðu milli 30 og 40 tónleikar.“
Þetta þarfnast nánari skýringa?
„Sko, ég flyt þá á einum og sömu tónleikunum bara verk undir einum bókstaf. Tökum A sem dæmi. Þá get ég valið úr að flytja verk höfunda sem hafa allir A sem fyrsta staf í nöfnum þeirra, eða vel verk sem byrja á A í titli eða flyt verk sem eru öll í A tóntegund. Ég ætla að dunda mér við það á næstu árum að renna svona í gegnum allt stafrófið.“
Börnin hjálpa til
Ekki er nóg með að tónleikatörn Eyþórs nái himinhæðum á næstunni heldur er einnig háannatími fram undan í kirkjulegu starfi vegna jólanna. Auk guðsþjónusta um hátíðirnar sjálfar flytur Kirkjukór Akureyrarkirkju (sem Eyþór stjórnar einnig) sína árlegu jólatónleika. Nefna má fleira árvisst líkt og Ljósberatónleika Bjargar Þórhallsdóttur.
„Börnin eru rosa góð við okkur, þetta er pínu erfitt þeirra vegna, því við Elvý erum bæði á kafi í þessu, en þetta hefst allt með aðstoð góðra vina og ættingja. Börnin sýna þessu góðan skilning. Þau eru æðisleg.“
Óður til fuglanna
Lesendur Akureyrar vikublaðs eru fuglamyndum Eyþórs Inga vel kunnir en hann hélt um langt skeið úti myndaþætti um fugla í blaðinu. Á tónleikum turtildúfnanna Elvýar og Eyþórs fjalla öll lögin um fugla í einhverri mynd. Þá verða fugalmyndir Eyþórs til sýnis á tónleikum þeirra tveggja.
-BÞ
