Samtök ferðaþjónustunnar lögðu í mikla vinnu árið 2011 við að finna leyfislausa gististaði og þrýstu í kjölfarið á stjórnvöld að taka á vandanum, benda viðkomandi á að sækja um rekstrarleyfi og fara að lögum og reglum, ella yrði stöðunum lokað. Í nýjasta fréttabréfi SAF kemur fram að stjórnvöld hafi ekki staðið sig sem skyldi í þessum málum og eftirfylgni verið engin með þeim afleiðingum að fjöldi slíkra gististaða hafi margfaldast án þess að nokkð sé í því gert.
Fulltrúar SAF áttu í byrjun árs fundi með fjármálaráðherra og innanríkisráðherra og kröfðust þess að tekið yrði á þessu máli af fullri hörku því það væri „óþolandi að heiðarlegir gististaðir þyrftu að vera í samkeppni við leyfislausa og jafnvel svarta staði auk þess sem engar öryggisúttektir eiga sér stað hjá slíkum aðilum,“ eins og segir í fréttabréfi SAF.
Nú hefur aðgerðarhópur verið stofnaður að ósk SAF þar sem SAF, Ríkisskattstjóri, fjármálaráðuneyti, innanríkisráðuneyti og atvinnu- og nýsköpunarráðuneyti eiga sæti ásamt fulltrúum stjórnvalda. Unnið er nú að tillögum og leggja samtökin áhersu á að ekki sé um átak að ræða heldur ferli sem er til framtíðar.
