Árið 1984, þegar ég var 2ja ára, kom út lagið „Hjálpum þeim“. Ég féll fyrir þessu lagi strax og ég man að ég sat og hlustaði á þetta lag aftur og aftur og horfði á myndina af litla svanga barninu með fluguna í munnvikinu á plötuumslaginu og hugsaði með mér hvað ég væri heppin að hafa aldrei þurft að borða flugur. Þarna strax gerði ég mér grein fyrir að það eru ekki allir jafn heppnir og þvílík forréttindi að fá að fæðast á þeim stað sem ég fæddist á.
Þetta hefur alltaf fylgt mér og ég eins og svo margir aðrir skráð mig sem heimsforeldri og látið þar við sitja. Það er frábært starf sem Unicef er að vinna, ekki misskilja mig, en mig hefur alltaf langað til að gera meira. Samt sem áður gerði ég aldrei neitt í málinu og um jólin þegar Hjálpum þeim ómaði í útvarpinu (og ég söng með fullum hálsi) hugsaði ég alltaf, „hvað hef ég í rauninni gert þetta árið til að hjálpa þeim“?
Ég hélt alltaf að ég þyrfti að vera í hjúkrun, enskukennari eða læknanemi og í raun voru ástæður þess að ég væri ekki búin að fara endalausar.
Þangað til í haust!
Ég fékk sendan tölvupóst í gegnum skólann minn þar sem auglýst var eftir sjálfboðaliðum til að byggja leikvöll á skólalóð og vinna í listasmiðjum með börnum í Úganda. Þarna fann ég enga afsökun. Ég er í ágætis formi og já ég hef svo sannarlega unnið með börnum í gegnum árin í leik og listum, svo þarna var komin vettvangur fyrir mig að hjálpa þeim.
Já ég er s.s. að fara til Jinja í Uganda í ágúst að vinna með krökkum sem hafa beðið eftir okkur í heilt ár. Mikil spenna hjá þeim sem og okkur sem erum að fara, þetta verður yndislegt, krefjandi og lærdómsríkt og hlakka ég til að upplifa öll ævintýrin.
Það sem að mig langar að biðja ykkur um að gera er að hjálpa mér að safna smá pening. Fjáröflunin mín er farin ágætlega af stað en mig vantar aðeins meira.
Það sem ég ætla að gera er að heita á ykkur - ef ég verð komin upp í 1500 pundin áður en ég kem til Íslands í lok apríl þá ætla ég að klippa af mér allt hárið og gefa til Breska krabbameinsfélagsins sem tekur við hári í hárkollugerð.
Þetta er það sem kallast að slá tvær flugur í einu höggi
Ef þú hefur áhuga á því að styrkja verkefnið kíktu þá áwww.justgiving.com/sigyn eða sendu mér línu á sigyn@pds.is.
Hér má lesa meira um verkefnið og samtökin www.eastafricanplaygrounds
Öll framlög fara beint til verkefnisins
Bestu kveðjur
Sigyn Blöndal
