Á fundi síðastliðinn mánudag ákvað Sagafilm ásamt fulltrúum frá Sambandi Íslenskra framhaldsskóla að söngkeppni framhaldsskólanna 2013 yrði haldin á Akureyri helgina 19. – 21. apríl næstkomandi.
Keppnin verður mun stærri og með öðru sniði en síðustu ár en undankeppni verður haldin á föstudagskvöldinu í Íþróttahöllinni og verður henni hvorki sjónvarpað né útvarpað og munu því aðeins áhorfendur í sal njóta allra atriða en á laugardagskvöldinu verður bein útsending á Rúv frá úrslitum keppninnar þar sem 12 bestu atriðin keppast um sigurinn.
Framhaldsskólanemendur sem og aðrir geta keypt söngkeppnisarmbandið hjá nemendafélögum framhaldsskólanna en með því fæst aðgangur að bæði undan- og aðalkeppninni auk fleiri viðburða sem haldnir verða á Akureyri þessa sömu helgi s.s. tónleika og gjörninga á vegum Sambands Íslenskra framhaldsskóla og Akureyrarbæjar.
„Við stefnum að því að hafa þéttskipaða dagskrá alla helgina, þar sem þetta er í fyrsta skipti þar sem söngkeppnin er tvö kvöld í stað eins,“ segir Alda Karen Hjaltalín, formaður nemendafélags MA. „Við ætlum að rífa upp stemminguna í bænum stútfylla bæinn af fólki og rosa góðri stemmingu“.
Einn skugga ber þó á undirbúninginn því samkvæmt frétt á DV frá því í morgun að fyrrverandi skipuleggjandi keppninnar, fyrirtækið Almiðlun, neiti að gefa skipuleggjendum keppninnar aðgang að Facebooksíðu keppninnar. 15.000 manns hafa „líkað“ síðuna og hún því mikilvæg samskiptaleið milli skipuleggjenda og gesta. Fyrirtækið Almiðlun hefur nú verið úrskurðaður gjaldþrota en fyrrverandi stjórnarmaður þess og starfsmaður, Einar Benedikt Sigurðsson, segir skipuleggjendur nú þurfa að greiða 250.000kr til að fá aðgang að síðunni.
