Akureyringurinn og fjöltónlistarmaðurinn Matthías Stefánsson herjar á Norðurlandið nú í dymbilvikunni ásamt félaga sínum Jónasi Þóri píanóleikara en í gærkvöldi héldu þeir tónleika í Ólafsfjarðarkirkju.
Í kvöld spila þeir í Ketilhúsinu á Akureyri en á morgun, skírdag, í Dalvíkurkirkju. „Við munum bjóða uppá huggulega tónleika þar sem þekkt kvikmyndatónlist, ballöður, tangó og sígaunatónlist og allt þar á milli mun fá að hljóma,“ segja þeir, en með tónleikunum eru þeir að kynna nýju plötuna sína, Paradiso sem hljóðrituð var í Þjóðmenningarhúsinu í ágúst sl.
Meðal laga sem fá að hljóma á tónleikunum eru Cinema Paradiso, Theme from Shindler’s list, Il Postino, Summertime, úr gítarkonsert Rodrigos og fleiri falleg, kröftug lög.
Tónleikarnir hefjast kl. 20 og munu standa í ca 70-80 mínútur. Forsala aðgöngumiða er í Eymundsson og er miðaverði stillt í hóf, aðeins 1500 krónur.
Hér má sjá og heyra sýnishorn af stemmningunni
