„Páskar eru í nánd. Sú staðreynd blasir ekki bara við okkur á dagatali, hún er sýnileg í umhverfinu, brátt birtir við dagrenningu og nóttin rennur saman við morguninn. Í anddyri vorsins berast okkur boð um að lífið sé máttugra en dauðinn, Kristur er upprisinn og til þess að skilja það verðum við að þreifa á lófum skaparans, lófar hans er sunnangola og ilmur af nýslegnu grasi, jarmandi lamb á völtum fótum og rigningarskúr á júnímorgni, fífil í túni og hlæjandi börn. Lífið er máttugt, það eru skilaboð páskanna,“ segir Hildur Eir Bolladóttir, prestur við Akureyrarkirkju.
Enginn páskakvíði!
Blaðið bað Hildi Eir og bæjarstjórann á Akureyri, Eirík Björn Björgvinsson, um þeirra uppskrift að góðum páskum. Þau eru sammála um að trúin og nándin sé þar mikilvæg.
„Við heyrum ekki oft talað um páskastress eða páskakvíða, ekki eins og jólastress eða jólakvíða. Kannski er það tíðarandinn sem þar veldur, sennilega er mjög erfitt að markaðssetja krossinn, dauðann og upprisuna. Það er ekki uppi nein sérstök krafa um að vera kátur og hress á páskum, þú mátt bara vera eins og þér sýnist, í því er fólgið mikið frelsi. Píslarsagan er staðfesting þess að Kristur þekkir alla líðan og engin þjáning er þar undanskilin, það er skýr orðsending frá Golgatahæð. Og svo er það upprisan, þessi atburður sem við vitum ekki almennilega hvernig við eigum að skilja eða túlka. En einhversstaðar djúpt í sál okkar, reynslubrunni og árum hefur fæðst með okkur sannfæring um það að fólk geti risið upp úr öllum aðstæðum. Við vitum ekki alltaf hvernig en við höfum séð það og þegjandi lútum við höfði og þökkum,“ segir Hildur Eir.
Uppáhaldsmessan
Spurð hvað rísi hæst á páskunum hjá prestinum sjálfum, segir Hildur Eir: „Það er kannski skrýtið af presti að viðurkenna að hann haldi upp á eitt helgihald umfram annað en ég geri það, ég held sérstaklega upp á messuna á páskadagsmorgni kl 8:00, mér finnst hún alltaf vera nýtt upphaf, nýtt tækifæri og þó ekki væri fyrir annað en að sjá geisla morgunsólar lýsa upp steindu gluggana í Akureyrarkirkju þá er það þess virði að koma. Sjá andlit Hallgríms Péturssonar í morgunskini austurgluggans, mannsins sem færði píslarsöguna í ódauðleg orð. Sjá Coventry gluggann fyrir miðjum kór, vitnisburð um von í stríðshrjáðum heimi. Ég mæli með því að fólk undirbúi vorið um páska, hið innra og ytra vor, taki til í garði sálar og sinnis og njóti útiveru, tónleikahalds, samveru með ástvinum, hlusti eftir Lóunni, börnunum, ástinni og lífinu. Já - leggjum við hlustir.“
Huggulegheit og samvera
„Rétt eins og sjálf jólin eru páskarnir hjá mér og fjölskyldu minni sjaldnast með sama sniði né endilega fyrirfram skipulagðir þ.e. ef ekki hefur verið ákveðið að leggjast í ferðalög. Ég á því engar hefðir til að ljóstra upp um sem gefið geta skothelda uppskrift af góðum páskum. Páskafríið tengist þó fyrst og fremst huggulegheitum og samveru fjölskyldunnar í mínum huga,“ segir Eiríkur Björn Björgvinsson, bæjarstjóri á Akureyri, spurður um „páskauppskriftina“.
Engin pressa í fjallið
„Við höfum stundum heimsótt stórfjölskylduna suður um páska en þetta árið hafa foreldrar mínir boðað komu sína norður og munum við leggja okkur fram um að taka vel á móti þeim eins og Akureyringa er siður. Fleiri gestir að sunnan hafa einnig boðað komu sína. Veðrið mun að vanda spila töluvert hlutverk, a.m.k. hvað vægi útiverunnar snertir en ljúflegheit innandyra í góðum mat og félagsskap fær hinsvegar ekkert spillt,“ bætir hann við.
Eiríkur býst við líflegum páskum í bænum og telur að Akureyri verði þéttsetin af gestum sem honum finnist afar upplífgandi tilhugsun. „Mér finnst hugmyndin um skíðapáska í Hlíðarfjalli alltaf heillandi en þegar allt kemur til alls eru þó meiri líkur á að ég velji allar aðrar helgar en páskahelgina til þeirrar iðju sem sennilega helgast af þeim forréttindum sem felast í því að búa við fjallsræturnar.“
Innrætir sonum kristin gildi
Spurður um trú og trúrækni, segir bæjarstjórinn: „Ég er trúaður þó ekki sæki ég kirkju með reglulegum hætti og hef lagt mig fram um að innræta sonum mínum gildi kristinnar trúar. Engin ákvörðun hefur verið tekin um það hvort við munum sækja messu um páska en hugmyndin er góð.“
