Hús vikunnar eru tvö og við höldum okkur við hús Sveinbjarnar Jónssonar, en ég hef sl. tvö skipti tekið fyrir verk hans en húsin sem hann annaðhvort teiknaði eða byggði á Akureyri og í nágrenni árabilið 1920-35 skipta tugum. Hér eru það tvö parhús Sveinbjarnar í Norðurgötu sem bæði eru byggð 1926, ekki ósvipuð að lögun en annað “nokkrum númerum” stærra.
Norðurgötu 16 byggðu þeir Jóhann Þórðarson og Aðalsteinn Sigurðsson árið 1926 eftir teikningum Sveinbjarnar. Húsið er tvílyft, steinsteypt parhús með háu söðulþaki á kjallara og telur þannig alls fjórar hæðir þegar kjallari og ris er talin með. Tveir flatir kvistir eru á hvorri hlið þaks. Norðurgata 16 hefur líkast til verið með stærstu húsum á Eyrinni þegar það var reist, en stærri eru fjölbýlishús við Gránufélagsgötu 39-41 sem byggð voru fáeinum árum síðar. Frá upphafi hefur húsið skipst í tvo eignarhluta, austur og vestur og nú eru alls fjórar íbúðir í húsinu, tvær í hvorum hluta. Þessi mynd er tekin 12.mars 2011.
Norðurgata 26 er tvílyft steinsteypuhús með tiltölulega lágu risi eða söðulþaki og hefur frá upphafi verið skipt í tvær íbúðir, byggt fyrir tvær fjölskyldur af þeim Magnúsi Halldórssyni og Jóni Sigurðssyni. Ekki er því þó skipt þannig að hvor íbúð sé á sinni hæð heldur skiptist það í miðju og er hvor íbúð á tveimur hæðum í hvorum enda. Húsinu hefur lítið verið breytt frá upphafi a.m.k. að utanverðu; í vesturenda eru upprunalegir gluggapóstar með einföldum glerjum sem gefa húsinu ákveðinn svip en skipt hefur verið um pósta í austurhluta. Hár skorsteinn er einnig áberandi á húsinu en þegar kynt var með kolum eða mó gat verið ágætt að hafa skorsteina í hærra lagi til að beina reyknum hærra upp. Annars er Norðurgata 26 nokkuð látlaust og einfalt að gerð og fellur vel inní götumynd Norðurgötu. Þessi mynd er tekin að kvöldi 31.júlí 2011.
Fyrir þá sem vilja kynna sér fleiri hús í bænum þá minni ég á síðuna mína www.arnorbl.blog.is en nýlega náði ég 200.pistlinum og flestar greinarnar sem birtast hér eru unnar uppúr pistlunum á þeirri síðu.
Í næsta pistli mun ég halda áfram að fjalla um verk Sveinbjarnar en hann hannaði tvö þekkt og áberandi stórhýsi við Hafnarstræti en hvaða hús það eru, kemur í ljós næst.
Arnór Bliki Hallmundsson
Heimildir: Fyrir þá sem vilja kynna sér betur og ítarlegar Sveinbjörn Jónsson og hans verk langar mig að mæla með bókinni Byggingarmeistari í stein og stál, eftir þá Friðrik G. Olgeirsson, Halldór Reynisson og Magnús Guðmundsson. Hér er um að ræða ævisögu og starfsferilssögu Sveinbjarnar sem kom svo sannarlega víða við og afkastaði miklu á langri starfsævi. Bókin er gefin út af Fjölva í samvinnu við Ofnasmiðjuna árið 1996- en það ár hefði Sveinbjörn orðið 100 ára
