Visir.is birti nú í kvöld pistil eftir Sigurð Steinþórsson 26 ára íbúa á Húsavík um baráttu hans við þunglyndi og harða gagnrýni á geðheilbrigðisþjónustu á landsbyggðinni. Sigurður segir frá því að hann hafi glímt við þunglyndi og sjálfsvígshugsanir í tvö ár en fengið afskaplega slitrótta og takmarkaða þjónustu í heilbrigðiskerfinu. Hann nefnir dæmi þess að hann hafi þurft að bíða langan eftir að hitta geðlækni m.a. vegna ófærðar og forfalla.
Sigurður segist vera þekktur fyrir það að skrifa og segja það sem hann hugsi og bendir á að á einu sumri hafi sex manns reynt sjálfsvíg á Húsavík og þar af hafi einum tekist það. „Nú spyr ég sjálfan mig að því. Hefur þetta fólk leitað sér hjálpar og komið að „lokuðum dyrum“ eins og ég og ákveðið að taka líf sitt. Finnst fólki þetta bara allt í lagi? Húsavík er ekki stórt samfélag en hérna þekkja allir alla og ef eitthvað gerist þá spyrst það fljótt út. Hérna búa kannski í kringum tvö þúsund manns og að sex þeirra hafi reynt að drepa sig á einu sumri finnst mér út í hött. Að bæjaryfirvöld og sjúkrahúsið skuli ekki skammast sín fyrir hvernig þetta er. Ég þori ekki að vera með barnið mitt nálægt mér ef ég get ekki einu sinni fengið hjálp við mínum vandamálum sem auðvitað ég þarf að leysa sjálfur og það er enginn annar sem gerir það fyrir mig en ég þarf að kunna að leysa úr þeim, fá ráð við þeim og ég fæ það ekki,“ segir Sigurður í pistli sínum og veltir því fyrir sér hvernig ástandið sé á öðrum stöðum á landsbyggðinni enda séu bara geðdeildir á Akureyri og í Reykjavík.
Sigurður hvetur fólk til að kvarta yfir aðstöðunni við sinn spítala ef þess er þörf.
Pistil Sigurðar má lesa í heild sinni hér.
