„Þetta eru góð tíðindi fyrir Bjarta framtíð og sýnir okkur að við erum á réttri leið. Það er eftirspurn eftir öðrum áherslum í pólitík, skemmtilegri pólitík þar sem áhersla er lögð á vinnubrögð en ekki þvinga í gegn stór kosningarloforð sem oft á tíðum sundra samfélaginu. Næstu skref eru að auglýsa opinn stofnfund og gefa fólki tækifæri til að koma að starfinu strax í upphafi og hafa þannig áhrif á samfélagið sem við viljum búa í. Við eigum alveg eftir að útfæra það hvernig staðið verður að framboðslista hjá okkur, fyrst er að halda stofnfund og sjá hverjir vilji taka þátt, þetta skýrist allt með hækkandi sól,“ segir Preben Pétursson, varaþingmaður Bjartrar framtíðar í NA-kjördæmi vegna nýrrar fylgiskönnunar.
„Það kemur helst á óvart hversu gífurlega miklu fylgi L listinn tapar samkvæmt þessu,“ segir Logi Már Einarsson, bæjarfulltrúi Samfylkingar á Akureyri um niðurstöður skoðanakönnunar sem Félagsvísindastofnun hefur unnið og birtist í Morgunblaðinu um helgina.
Könnunin sýnir að L-listinn fengi einn bæjarfulltrúa ef kosið yrði nú til sveitarstjórnar á Akureyri og virðist hrun L-listans öllum þeim oddvitum flokkanna á Akureyri sem blaðið leitaði viðbragða hjá efst í huga. Þá þurrkast Bæjarlistinn, sem Sigurður Guðmundsson leiðir, nánast út, fengi aðeins 1,7% atkvæða og engan fulltrúa í bæjarstjórn samkvæmt mælingunni.
Sigurður Guðmundsson, bæjarfulltrúi og oddviti Bæjarlistans, segir að niðurstaða könnunarinnar sé ekki í takt við hans tilfinningar. „Að meirihlutinn falli svo hátt fyrir litlar sakir er skrýtið.“
Sigurvegarar í könnun Félagsvísindastofnunar eru Sjálfstæðisflokkur og Björt framtíð. Sjálfstæðismenn fengju þrjá menn í stað eins í bæjarstjórn nú og Björt framtíð fengi tvo. „Fylgi Bjartrar framtíðar skil ég ekki þegar ekki er til stefnuskrá og enginn veit hver leiðir listann. Það sýnir kannski svart á hvítu hina óheilbrigðu tengingu lands- og sveitarstjórnarpólitíkur. Verk manna eru lítils metin þegar kemur að könnunum,“ segir Sigurður Guðmundsson.
Ólafur Jónsson, oddviti sjálfstæðismanna segir að mælingin hafi verið í samræmi við tilfinningu sjálfstæðismanna. „Enda höfum við fundið fyrir vaxandi stuðningi við okkar málflutning og þau mál sem við höfum lagt áherslu á. Það er ánæjulegt að hafa góðan byr og sjá að við erum að bæta við einum manni frá síðustu könnun og tveimur frá kosningum.“
Hann segir það koma helst á óvart að L-listinn sé kominn aftur á byrjunarreit samkvæmt þessu. Um Bjarta framtíð segir Ólafur að þar sé e.t.v. um að ræða „áhrif að sunnan“.
VG fengi 16% og bætti við sig öðrum fulltrúa. Sömu sögu er að segja af Framsóknarflokknum sem fengi 15,6%. Samfylkingin fengi 11% og héldi sínum eina fulltrúa í bæjarstjórn.
„Gott gengi Bjartrar framtíðar skýrist án efa af því að enn er umtalsvert vantraust á fjórflokknum. Þó er fylgið merkilega mikið miðað við það að enn er framboðið án andlits og stefnu,“ segir Logi Már Einarsson.
Um niðurstöðu eigin flokks segir Logi: „Ég hafði satt að segja lítið velt fyrir mér stöðunni fyrir þessa könnun en fannst þó að Samfylkingin væri aðeins að finna taktinn hérna í bænum. Samkvæmt þessari könnun er það greinilega misskilningur.Það er ljóst að við verðum að bretta upp ermar og bíta í skjaldarrendur ef jafnaðarstefnan á að verða annað en fögur orð á blaði næsta kjörtímabil.“
Geir Kristinn Aðalsteinsson sem leiddi L-listann þegar aflið fékk hreinan meirihluta og sem menn af ellefu, segist að sjálfsögðu hafa vonast eftir betri útkomu fyrir L-listann. Hann taki mark á þessari könnun eins og iðulega þegar skoðanakannanir eru annars vegar. „Þó að svarendur sem tóku afstöðu séu afar fáir, 264, ef ég man rétt, gefa slíkar kannanir alltaf ákveðnar vísbendingar og þær þurfum við L-listafólk að taka til okkar. Störf okkar eru ekki alltaf sýnileg og e.t.v. þurfum við að vera duglegri við að koma okkar störfum á framfæri við bæjarbúa.“
Geir segir það lága fylgismælingu Bæjarlistans einnig koma á óvart en aðra könnun þurfi með fleiri svarendum til að staðfesta að þetta sé raunveruleg staða. „Einnig kemur mér óvart mikið fylgi við Bjarta framtíð, þar sem að lítið sem ekkert er vitað um framboðið hér á Akureyri. Miðað við þessa niðurstöðu þá þarf þriggja flokka meirihluta á næsta kjörtímabili og þá læðist að manni sú hugsun hversu margir bæjarstjórar verða á Akureyri á kjörtímabilinu miðað við reynslu fyrri tíma.“
Andrea Hjálmsdóttir, oddviti VG á Akureyri, segir að VG megi vel við una í þessari mælingu Félagsvísindastofnunnar. „Það er alltaf erfitt að meta tilfinningu um fylgi flokka en það kemur mér ekki á óvart að L-listinn tapi fylgi, en tapið er þó meira en ég hafði reiknað með. Ég hafði ekki séð fyrir að það fylgi sem eftir er færi yfir á Bjarta framtíð með jafn skýrum hætti og könnunin sýnir. Þó fylgi Sjálfstæðisflokksins komi mér alltaf jafnmikið á óvart svona yfirleitt þá er aukning þeirra kannski minni tíðindi í ljósi stöðunnar í landsmálunum og augljóst er að kjósendur klofningsframboðsins Bæjarlistans ætla tilbaka. Það sem mér fannst þó áhugaverðast í þessari könnun er flokkshollusta kjósenda Bjartrar framtíðar því eins og fram kom ætla 80% þeirra sem kusu Bjarta framtíð í alþingiskosningunum að kjósa sama flokk í bæjarstjórn. Þetta slagar upp í flokkshollustu kjósenda Sjálfstæðisflokksins sem kemur þó mun minna á óvart í ljósi sögunnar. Fylgisaukning okkar í VG kemur ekki á óvart í ljósi þeirra verkefna sem kjósendur telja mikilvægustu í sveitafélaginu, en flest þeirra sem þátt tóku í könnuninni telja velferðar- og félagsþjónustu brýnustu verkefnin á Akureyri. Þar hefur VG skýra stefnu og hefur talað fyrir félagslegum áherslum í bæjarfélaginu.“
Ekki fengust viðbrögð frá Guðmundi Baldvini Guðmundssyni, oddvita framsóknarmanna á Akureyri.
-BÞ
