Lof fær íslenska handboltaliðið fyrir frábæra frammistöðu á Evrópumótinu, skrifar karl á Akureyri í bréfi til blaðsins. Hann segir að strákarnir okkar vinni iðulega þrekvirki með því að skemmta landanum í þessum „leiðinlegasta mánuði ársins“ eins og hann orðar það. Verst sé að sumir séu þeim vanþakklátir…
Lof fá þeir sem sjá um að ryðja götur bæjarins en þar hefur heldur betur verið tekið til hendinni síðustu daga og eru flestar götur og gangstéttir nú greiðfærar. Lofa skal það sem vel er gert, segir kona sem hringdi í blaðið. Hún segir að stundum virðist sér sem breytingar sem hafa verið gerðar á framkvæmd snjómoksturs bitni á þjónustu við borgara en nú standi bærinn sig vel…
Last fá þeir vegfarendur sem nýverið óku framhjá bíl sem fór út af í brjáluðu veðri á Möðrudalsörfæfum án þess að kanna ástand ökumanns og farþega, hvort allt væri í lagi. Þetta segir ungur maður í Innbænum í bréfi til blaðsins. Hann segir að í neyð verði allir að hjálpa öðrum og betra sé að bjóða fram aðstoð sem verði afþökkuð en sýna fálæti sem geti leitt til skaða. Akureyri vikublað tekur undir það…
Last fá þingmenn og ráðherrar sem þykjast geta komist upp með hvað sem er, lygar, bellibrögð og annað, allt í þágu þess að víkja sér undan vandamálum. Þetta segir maður frá Húsavík sem kallar í pósti til blaðsins enn eftir siðbót meðal stjórnmálamanna. Hann segist stundum gruna að öll íslenska þjóðin hafi lært eitthvað af hruninu. Nema stjórnmálamenn og spilltir viðskiptamógúlar. Það sé kaldhæðnislegt vegna þess að hrunið hafi verið þessum tveimur hópum að kenna, þeir hafi vaxið saman í græðgi sinni og fyrir það gjaldi almenningur enn og muni gera næstu áratugi…
Lof fær Leikfélag Akureyrar fyrir frábæra sýningu á Gullna hliðinu, segir leikhúsunnandi á Akureyri sem segist sjaldnar hafa farið eins glaður út úr Samkomuhúsinu og síðastliðinn föstudag. Til hamingju LA!…
