Lögreglan á Akureyri óskaði eftir aðstoð Vegagerðarinnar um miðnætti í gær vegna glærahálku sem hafði myndast á Moldhaugnahálsinum, rétt norðan Akureyrar. Vegagerðin varð ekki við beiðni lögreglunnar og taldi sig ekki geta farið í verkefnið sökum niðurskurðar.
G. Pétur Matthíasson, upplýsingafulltrúi Vegagerðarinnar, segir það hafa verið mistök af hálfu þeirra að fara ekki í þetta verkefni að hálkuverja um leið og lögregla óskaði eftir aðstoð. „Það voru mistök af okkar hálfu að hafna beiðni lögreglu á þessum tíma. Það hefur verið óskráð regla hjá okkur að bregðast við óskum lögreglu. Ef lögregla metur aðstæður þannig að um hættu sé að ræða höfum við alltaf farið í þau verk að tryggja öryggi eins fljótt og við getum. Við höfum alltaf unnið í góðu samstarfi við lögreglu og hörmum þessi mistök“ sagði G. Pétur í samtali við akv.is.
„Nú munum við fara yfir verklag og verkferla hvað þetta varðar og hnykkja á þessari óskráðu reglu hjá okkur að sinna kalli lögreglu“
Illa búinn bílaleigubíll fór út af veginum um miðnættið og valt með þrjá ferðamenn innanborðs. Bílaleigubíllinn var á sumardekkjum. Þegar lögregla og sjúkraflutningamenn voru á vettvangi þurfti fulllestaður flutningabíll að stöðva í brekku. Við það komst hann hvorki lönd né strönd og þurfti að keðja flutningabílinn í brekkunni. Lögreglan var á vettvangi í á þriðju klukkustund við að tryggja öryggi ég veginum.
