Margir stunda hestamennsku að atvinnu og sér til skemmtunar. Til þess að hægt sé að stunda hana þarf góða reiðvegi. Víða um land er hestatengd ferðaþjónusta í miklum blóma. Á Akureyri og nágrenni hefur slík þjónusta ekki náð sér vel á strik vegna skorts á góðum reiðleiðum. Það er synd því með bættum reiðvegum væru ágætis aðstæður fyrir hana hér. Fleiri ferðamenn styrkja aðra þjónustu hér í kring.
Opinberar tölur frá Hagstofu Íslands sýna að ca. 20-23 milljarðar koma til þjóðfélagsins vegna hestatengdrar ferðaþjónustu. Landssamband Hestamanna, LH, fær 50 milljónir af þessum peningum og skiptast þeir á öll hestamannafélög í landinu til viðhalds og endurnýjunar. Hestamannafélagið hér á Akureyri, Léttir, fékk 2 milljónir árið 2012. Þessi upphæð fer t.d. í að laga ræsi, brýr, girðingar, gamla reiðvegi og búa til nýja. Akureyrarbær hefur alfarið kostað reiðvegagerð í landi Akureyrar og sinnt viðhaldi og snjómokstri. Akureyrarbær hefur staðið sig vel og má nefna að í haust var í fyrsta skiptið gengið frá reiðvegamálum í aðalskipulagi Akureyrarbæjar. Það er mjög jákvætt og auðveldar framkvæmdir í framtíðinni. Það er snúið að koma upp reiðvegi í þéttbýlu sveitafélagi. Það þarf að huga að mörgu; golfvöllum, ökumönnum, tjaldstæðum, landeigendum o.s.frv. Oft þykir okkur hestamönnum þjarmað að okkur þegar við missum reiðvegi. En vitaskuld verður að deila landi.
Það eru margar fallegar og góðar reiðleiðir sem við höfum hér í kring. Reiðleiðirnar yfir Bíldshálsskarðið í Fnjóskadalinn austur í Sörlastaði eru fjölfarnar og fleiri leiðir mætti telja. Í sumar verður hægt að fara inn á kortasjá á vefsíðu LH og skoða kortlagðar reiðleiðir. Með þeim munu fylgja nákvæmar upplýsingar um áningarstaði og þjónustu í kring. Kortasjáin getur auðveldað ferðafólki að koma á nýja staði og ríða út. Reiðvegirnir okkar yrðu auglýstir. Reiðvegurinn frá Akureyri að Hrafnagili er góður en það vantar aðeins 8 km upp á reiðveginn alveg fram á Melgerðismela og þaðan inn í Eyjafjarðarbotn. Ef við höfum ekki reiðvegi verðum við að ríða á þjóðveginum. Sem er tilfellið á nokkrum stöðum. Það er hættulegt bæði fyrir menn og hesta og alls ekki bjóðandi ferðamönnum. Það væri okkur til gagns að bæta reiðleiðirnar hér. Þá gætum við kynnt þær og laðað að hestatengda ferðaþjónustu, sem skortur er á. Litlir og stórir hópar nota mikla þjónustu. Þeir þurfa pláss fyrir hestana, gistingu, borða á veitingastöðum og heimsækja sundlaugar. Allt þetta er til staðar í Eyjafjarðarsveit. Það efast heldur enginn um fegurð Eyjafjarðar; fjöllin sem gnæfa yfir sveitina, Eyjafjarðarána og perluna okkar, Akureyri. Ljúkum gerð reiðvega um Eyjafjörð til þess að heimamenn og ferðamenn geti notið fegurðarinnar á góðum reiðvegi.
Þóra Höskuldsdóttir
Höfundur er nemandi í 10. bekk í Giljaskóla.
