Fimmtudaginn 13. júní kl. 18 heldur Guðrún Darshan jógakennari og hómópati kynningu á jógakennaranámi í Kundalini Jóga í Orkulundi á Akureyri. Þar fer Guðrún yfir jógakennaranámið sem kennt er í jógastöðinni Andartak í Reykjavík og möguleika því tengdu. Allir eru velkomnir, byrjendur jafnt sem lengra komnir.
Guðrún segir jóga vera elsta mannræktarkerfi heims og aldrei hafa notið meiri vinsælda en einmitt nú og jógaáhugaiðkendum fari hratt fjölgandi. „Nýjustu rannsóknir sýna að um 8% fullorðinna bandaríkjamanna stunda jóga reglulega og það er 29% aukning frá rannsókn sem gerð var árið 2008,“ segir Guðrún og bætir því við að jógabylgjan sé tiltölulega nýlent á Íslandi og því megi búast við að vinsældir jóga margfaldist hér á komandi árum.
Kundalini jóga er eitt af mörgum formum jóga sem stunduð eru í heiminum og hefur notið mjög ört vaxandi vinsælda um allan heim. „Þetta er aldagamalt form af jóga og býður upp á mjög virkar leiðir til að takast á við streitu og álag nútímans og það er líka mjög aðgengilegt og eflandi,“ segir Guðrún.
Guðrún segir hátt í hundrað nemendur hafa útskrifast úr kennaranámi í kundalini jóga hér á landi frá árinu 2008. „Núna síðast í vor er 20 manna hópur að útskrifast frá Andartak“.
„Það getur verið dálítið erfitt fyrir okkur mörg að setjast niður og slaka á þegar búið er að vera mikið að gera og hugurinn er á flögri um víðan völl. Kundalini jóga byggir á taktföstum hreyfingum í takti við öndun og það er einmitt takturinn í æfingunum sem hjálpar huganum að sleppa streitunni og spennunni sem eru búnar að byggjast upp í annríkinu. Það er minni áhersla á teygjur og kyrrstöðu og meiri áhersla á að hreyfa við orkunni í gegnum öndun og takt,“ segir Guðrún.
„Æfingarnar hafa það markmið að styrkja innkirtlakerfi, taugakerfi og ónæmiskerfi – auk þess að gefa okkur bæði líkamlegan og andlegan styrk. Og hugleiðslan sem er óaðskiljanlegur hluti af kundalini jóga styrkir okkur í því að taka því sem að höndum ber af æðruleysi og að virkja kyrrðina og stækka þögnina innra með okkur“.
Guðrún telur að kundalini jóga höfði mjög vel til Íslendinga. „Af því við búum við svo mikið myrkur yfir veturinn og höfum þeim mun meiri þörf fyrir að kveikja ljósið innra með okkur“. „Kennaranámið er mjög eflandi og umbreytandi lífsreynsla og margir fara í námið bara fyrir sjálfa sig – ekki endilega með það markmið að fara að kenna. En svo endar oft með að þeir sem ætluðu það ekki í upphafi fara að kenna því það er svo gaman að deila því sem við finnum að gerir okkur gott“.
