Í dag, sunnudaginn 9. júní kl. 13-17 verður opið hús hjá ferðaþjónustubændum um allt land. Þeir bæir sem bjóða heim verða merktir með grænum og hvítum blöðrum við veginn.
Fólk er hvatt til að koma og fá sér kaffisopa, skoða aðstöðuna, spjalla við bændurna og upplifa sveitastemmninguna.
Á sumum bæjum verður hægt að heilsa upp á dýrin, fara á hestbak, gæða sér á heimabakstri og taka þátt í leikjum, föndri og fræðslu.
Á Engimýri í Öxnadal verður gestum boðið upp á kaffi og pönnukökur.
Í Skjaldarvík í Eyjafirði verður teymt undir börnum, hundar og hænur, léttar veitingar og karla- og drengjakór Hörgársveitar tekur nokkur vel valin lög. Gestum velkomið að skoða sig um.
Á gistiheimilinu Pétursborg í Hörgárbyggð verður Kaffi og vöfflur, föndur fyrir krakkana, trampolín og rólur í garðinum og hægt að heilsa upp á kanínur og hænur. Gestum velkomið að skoða sig um.
Á Brúnalaug í Eyjafjarðarsveit verður fyrirlestur um ylrækt kl. 15 og 16, grænmetissmakk og grænmeti til sölu. Ath. ekki má koma inn í gróðurhúsið ef maður hefur verið samdægurs í blómabúð, öðru gróðurhúsi eða garðskála
Á Öngulstöðum III í Eyjafirði verður heitt á könnunni og gestum velkomið að skoða sig um.
Að Eldá við Mývatn verður ljósmyndasýning, landslagsmyndir frá Norðausturlandi eftir svissneska ljósmyndarann góðkunna Max Schmid. Einnig skemmtilegar myndir Kára Jónassonar úr rúningsgöngum á Austurfjöllum sumarið 1960. Lifandi tónlist: Tríó Helga James en tríóið skipa: Helgi James Þórarinsson (13 ára), altsaxófónn, Jakob Stefánsson, bassi og Jón Illugason, gítar.
Á Hraunbæ og Hótel Rauðuskriðu í Aðaldal verður heitt á könnunni og gestum velkomið að skoða sig um.
