Tíu ár eru liðin síðan Kárahnjúkavirkjun var samþykkt og myndin In memoriam? var gerð fyrir erlendan markað um Kárahnjúkavirkjun og svæðið norðan Vatnajökuls.
Myndin hefur af þessu tilefni verið frumsýnd á Íslandi með íslensku tali í Bíói Paradís og verður sýnd í Hofi á Akureyri 13. júní kl. 20.
Ómar Ragnarsson verður viðstaddur sýninguna í Hofi, flytur inngang og eftirmála í bundnu og óbundnu máli og svarar spurningum ef svo ber undir.
„„In memoriam“ er algeng grafskrift á legsteinum, en sett var spurningarmerki við þetta heiti myndarinnar þegar hún var gerð við upphaf framkvæmda. Tíu árum síðar liggur fyrir að ekki þarf lengur spurningamerki um afdrif helstu náttúrugersema áhrifasvæðis virkjunarinnar, svo sem dauða Lagarfljóts,“ segir í kynningu á myndinni en í henni koma fram ýmis ný atriði, sem ekki hefur áður verið fjallað um hér á landi.
Myndin var send á tvær kvikmyndahátíðir erlendis og fékk önnur af tveimur aðalverðlaunum alþjóðlegu kvikmyndahátíðarinnar í Canavese á Ítalíu 2004.
Nánari upplýsingar má finna á vefsíðu Hofs
