Þrír af hverjum fjórum skíðamönnum nota hjálm og liðlega sex af hverjum tíu á snjóbrettum, samkvæmt talningu sem starfsmenn VÍS gerðu í Hlíðarfjalli, Oddsskarði og Bláfjöllum núna í janúar. Hjálmanotkun virðist því orðin nokkuð almenn meðal skíðafólks, 76% en betur má ef duga skal. Brettaiðkendur eiga svo lengra í land þar sem 63% notuðu hjálm. 605 manns voru í úrtakinu.
Flestir voru með hjálm í Hlíðarfjalli 87% og litlu færri í Oddsskarði eða 83% en í Bláfjöllum aðeins 62%. Brettafólk notar síður hjálm sem er mjög miður því það tekur yfirleitt mun meiri áhættu við æfingar sínar en skíðafólk. Lítill munur var á milli svæða.
Samkvæmt slysatölfræði Hlíðarfjalls fyrir veturinn 2012 til 2013 var um 80 slösuðum einstaklingum sinnt af skíðagæslunni þar. Sú tala gefur þó ekki fullkomna mynd af fjölda slasaðra, þar sem einhverjir fara meiddir í burtu án þess að leita til gæslunnar á svæðinu. Tölfræðin sýnir að 49% þeirra sem slösuðust voru á aldinum 10 til 19 ára. Munur á kynjunum var ekki ýkja mikill en karlmenn voru þó ívið fleiri. Flestir sem slösuðust voru byrjendur eða 37%. Einnig kemur fram að fjöldi slasaðra á skíðum var sá sami og á brettum en 46% þeirra sem slösuðust voru með hjálm en það sem skekkir þá tölu er að í 24% tilfella láðist að athuga hvort hjálmur hafi verið notaður. Skíðafólk slasaðist mun frekar á fótum en brettafólk á handlegg og höfuðáverkar voru í 7% tilfella.
75 þúsund gestir heimsóttu Hlíðarfjall þennan veturinn. Ekki er vitað um aldurs- eða kynjasamsetningu þeirra eða hlutfall skíða- og brettaiðkenda. Könnun VÍS sýndi þó að brettafólk var eingöngu þriðjungur iðkennda þann dag sem könnunin var gerð. Ef fjöldi gesta og fjöldi slasaðra er skoðaður þennan vetur er hlutfall þeirra sem slasast eingöngu 0,1% en sem verður að teljast ansi gott þó að hvert slys sé ávallt einu slysi of mikið.
Fréttin birtist á Heimasíðu VÍS
Með kveðju
Sigrún
