Pascal Heyman hefur komið til Íslands átta sinnum eftir hrun. Hann hefur því kynnst íslenskum ferðamannaiðnaði vel á þessum tíma. Hann telur ferðamannaiðnaðinn vera farinn á sumum stöðum að okra á ferðamönnum sem heimsækja land og þjóð. Í viðtali við Akureyri Vikublað gagnrýnir hann ferðamannaiðnaðinn fyrir of hátt verðlag fyrir slæma þjónustu
„Þetta er áttunda ferð okkar hjóna til Íslands síðan frá hruni 2008. Við höfðum á þeim tíma lengi viljað heimsækja landið, en eftir hrun varð mun hagstæðara að sækja landið heim en áður. Við höfum náð að sjá næstum alla landshluta nokkuð vel og finnst afar gott að komast út fyrir höfuðborgina og sjá landið betur og kynnast fólkinu sem býr þar. Höfuðborgin ykkar er eins og allar höfuðborgir, hafa ákveðinn sjarma en eru langt í frá þverskurður þess sem við viljum sjá. Þetta á við um nær allar höfuðborgir heimsins. Það er það sem er utan þess sem við viljum sjá og kynnast og höfum kappkostað okkur við að leita að.“
„Það er í raun miklu skemmtilegra að koma til Íslands á vetrarmánuðum, síðast vorum við hér á Íslandi í október. Þegar við heimsækjum Ísland viljum við sjá íslenska náttúru og Íslendinga. Á sumrin eru hér of mikið af ferðamönnum fyrir okkar smekk sem að einhverju leyti eyðileggur ánægju okkar af því að skoða landið. Við keyrðum hringveginn síðastliðið sumar, og þá voru sömu ferðamennirnir að dúkka upp á áfangastöðum vítt og breitt um landið. Þetta kenndi okkur líka að Ísland er ekki bara hringvegurinn, það skiptir svo miklu máli að komast út fyrir hringveginn til þess að geta skoðað íslenska hráa náttúru eins og hún gerist best.“
Finnst þér fjöldi ferðamanna vera orðinn að einhvers konar vandamáli á Íslandi?
„Á einhverjum tímapunkti verða Íslendingar að ákveða hvernig þeir vilja hafa ferðamannastrúktúrinn. Ef ferðamönnum finnst of mikið af öðrum ferðamönnum á landinu í einu er ég viss um að upplifun þeirra af landi og þjóð verður ekki sú sama. Þeir eru að koma og sjá stórbrotna náttúru og óspjallað landslag. Þegar ferðamönnum fjölgar svona mikið verður Ísland ekki eins ákjósanlegur áfangastaður og áður. Þetta er tvímælalaust eitthvað sem íslensk ferðamálayfirvöld verða að skoða. Stundum er þetta spurning um gæði ferðamanna frekar en magn.“
Hvernig finnst þér þróunin hafa verið í ferðamannaiðnaðinum á Íslandi frá því þú komst fyrst hingað?
„Það er í raun ótrúlegt hvað ferðamannaiðnaðurinn á Íslandi er í góðum höndum. Allt skipulag á iðnaðinum í heildinni er með ágætum. Ég kom hingað fyrst árið 2008, rétt eftir hrun, og hef komið hingað reglubundið síðan. Það sem slær okkur á ferðum okkar er að verð á þjónustu hefur farið hækkandi síðustu ár. Við höfum ágæta reynslu yfir þetta árabil. Nú, upp á síðkastið höfum við reyndar verið nokkuð ósátt á nokkrum stöðum fyrir allt of hátt verð á þjónustu sem er kannski ekki svo góð eftir allt saman.“
„Kannski er það út af því að ferðamannaiðnaðurinn reynir allt hvað hann getur til að ná í fjármagn á meðan á háannatíma stendur. Á sumum stöðum finnst mér verðið vera það hátt að mér finnst ég vera rændur. Þetta er ekki góð reynsla af landi sem ég ann. Íslendingar verða að passa sig á að verðleggja lélega þjónustu ekki svo hátt þannig að upplifunin af ferðinni verði neikvæð. Ég tel að þetta gæti reynst Íslendingum dýrkeypt þegar fram í sækir.“
