Norðurhjari er klasi ferðaþjónustuaðila sem ná frá Kelduhverfi í vestri að Bakkafirði í austri. Markmið Norðurhjara er að efla ferðaþjónustu á svæðinu og bæta aðgengi ferðamanna að mörgum náttúruperlanna sem svæðið hefur upp á bjóða, en þær eru margar enda víðfeðmt svæði. Þar er að finna flest allt sem hugan girnir, hvort heldur sem leitað er eftir stórbrotinni náttúru eða sögulegri menningu. Þetta er svæði þar sem marga fuglaskoðara dreymir um að verja vorinu og sumrinu en jafnframt sækjast veiðimenn í árnar og vötnin. Fræðandi ferðaþjónusta kemur æ sterkar inn og ósnortin náttúran það sem margan ferðamanninn langar að upplifa í fríi sínu frá amstri hins daglega lífs.
Norðurhjarasvæðið er nær en margur heldur. Það tekur ekki nema klukkutíma og 45 mínútur að keyra frá Akureyri í Gljúfrastofu, gestastofu Vatnajökulsþjóðgarðs í Ásbyrgi. Frá Ásbyrgi eru aðeins 40km til að komast á hjara veraldar að Melrakkasléttu. Frá Ásbyrgi og í paradís fuglaskoðunar að Langanesi eru ekki nema 120km. Það er áætlunarflug til Þórshafnar og Húsavíkur frá Reykjavík og strætó gengur frá Akureyri til Þórshafnar (ath. þarf að panta með 4 tíma fyrirvara).
Boðið er upp á ýmsa þjónustu á svæðinu: gistingu, veitingar og afþreyingu. Auðn og kyrrð eru áberandi fyrir svæðið og ströndin er áberandi hluti af Norðurhjarasvæðinu. Vegurinn með Melrakkasléttu er víða nánast í fjöruborðinu þar sem eyðibýli og rekaviður skipa stóran sess í umhverfinu. Á Melrakkaás við Raufarhöfn er að rísa Heimskautsgerði, sem þrátt fyrir að vera skammt á veg komið laðar þegar til sín áhugasama ferðamenn um íslenska menningu og norræna goðafræði. Fá svæði á Íslandi hafa upp á jafn mikla fjölbreytni af fuglategundum að bjóða til skoðunar og þetta svæði við jaðar heimskautsbaugs, hvort heldur sem er af staðfuglum, farfuglum eða flækingum.
Norðurhjarasvæðið býr yfir mikilli og fjölbreyttri náttúrufegurð og er sannkallað kjörlendi fyrir áhugamenn um jarðfræði en flekaskil Norður-Ameríkuflekans og Evrasíuflekans liggja um norður gosbeltið og til sjávar í Öxafirði. Vel þekktar jarðmyndanir eru í Jökulsárgljúfrum í Vatnajökulsþjóðgarði sem tilheyrir Norðurhjarasvæðinu en víða annars staðar í Kelduhverfi og Öxarfirði má sjá misgengi, sigdali, gíga og ýmsar aðrar jarðmyndanir og náttúruperlur.
Fræðslu um menningu og náttúru svæðisins er víða að finna, t.d. í Byggðasafninu við Snartarstaði, Skjálftasetrinu á Kópaskeri, við Heimsskautsgerðið á Raufarhöfn, í Sauðaneshúsi á Langanesi og gestastofu Vatnajökulsþjóðgarðs svo eitthvað sé nefnt.
Verið velkomin í heimsókn!
Inga Fanney Sigurðardóttir
Höfundur er verkefnisstjóri Norðurhjara.
