Eins og sjá má á meðfylgjandi mynd var Gleráin ekki kræsileg á að líta í hádeginu dag því rautt litarefni úr steypu frá Möl og sandi var skolað út í ána sem varð mjög rauðleit í kjölfarið.
Alfreð Schiöth, heilbrigðisfulltrúi Norðurlands eystra segir mjög slæmt að affallsvatn frá steypustöðinni fari beint út í Glerá en það sé vegna þess að Akureyrarbær gerir ekki ráð fyrir þessháttar starfsemi á svæðinu þar sem steypustöðin er. Það eru því engar affallslagnir á svæðinu en það stendur heldur ekki til að leggja þær þar sem starfsemin verður færð annað í framtíðinni. „Þeim er illa við að fá þetta inn á lagnakerfið og þess vegna hefur þetta verið látið viðgangast á meðan ekki er fundinn betri staður fyrir starfsemina,“ segir Alfreð og bætir við að ýmsar leiðir séu til að sporna við að mengun á borð við yfirborðsvatn frá götum sem og ýmissi starfsemi, fari út í umhverfið t.d. með setþróum.
Í reglum um starfsleyfisskilyrði fyrir steypustöðvar segir meðal annars:
4.4 Frárennsli frá stöðinni skal hreinsað áður en því er veitt í móttaka.
a. Fráveituvatn frá steypustöð, allri þvottaðstöðu fyrir búnað, tæki og bifreiðar, endurvinnslustöð, akstursleiðum í kringum steypustöð og öðrum þeim stöðum þar sem líkur eru á sementsríku vatni, skal leiða í fráveitu sveitarfélagsins nema um annað sé getið í lóðarskilmálum. Á fráveitu skal vera fellibúnaður eða annar búnaður með sambærilega virkni sem tryggi hreinsun á fráveituvatni að því marki að það geti ekki skaðað fráveitukerfi sveitarfélagsins
b. Afrennsli frá öðrum hlutum lóðar, en þar sem líkur eru á að vatn sé sementsmengað, skal leitt í sandfang áður en það fer í fráveitu bæjarfélagsins eða í annan móttaka í samræmi við lóðarskilmála.
Reglurnar í heild sinni má nálgast hér
Þessar myndir tók Völundur Jónsson af Glerá kl. 14 í dag
