Rauðrófur gefa dásamlega mýkt og raka í þessa köku og stífþeyttar eggjahvítur gera að verkum að hún er létt og ljúffeng. Soðnar rauðrófur er hægt að kaupa í lofttæmdum umbúðum í matvöruverslunum. Annars getur þú soðið rauðrófurnar og flysjað fyrir þessa uppskrift.
Kökudeig:
- 2 plötur Siríus Konsúm
- 5 msk rótsterkt kaffi
- 180 gr smjör, í bitum
- 125 gr hveiti
- 2 tsk lyftiduft
- 4 msk kakóduft
- 4 eggjarauður
- 5 eggjahvítur
- 180gr hrásykur
- 2 meðalstórar rauðrófur, soðnar
Smjörkrem:
- 200gr flórsykur
- 100gr smjör, mjúkt
- 1 msk rauðrófusafi
- 1 tsk vanilludropar
- 4-6 msk rjómi
Súkkulaðikrem:
- 2 plötur Siríus Konsúm
- 2 dl rjómi
- 5 msk síróp (eða 3 msk agave)
Byrjaðu á að hita ofninn í 170°C.
Bræddu 2 plötur af súkkulaði yfir vatnsbaði. Þegar súkkulaðið er bráðið hrærirðu kaffinu, smjörinu og hrásykrinum saman við þar til allt blandast vel. Taktu af hitanum og láttu kólna örlítið á meðan þú vinnur með eggin.
Þeyttu eggjahvíturnar þar til stífar.
Þeyttu eggjarauðurnar í annarri skál þar til þær verða ljósgular og freyða.
Maukaðu rauðrófurnar í matvinnsluvél eða mixer. Settu út í eggjarauðurnar og hrærðu vel saman. Bættu nú eggjarauðu og rauðrófublöndunni út í súkkulaðiblönduna. Hrærðu vel.
Settu þurrefnin (hveiti, lyftiduft, kakó) saman við og hrærðu vel saman svo verði mjúkt og kekkjalaust. Bættu að lokum stífþeyttum eggjahvítunum saman við, blandaðu varlega saman.
Helltu í tvö smurð 20-22cm springform og bakaðu í 30 mínútur.
Láttu kólna vel áður en þú setur smjörkremið á milli.
Til að útbúa smjörkremið þarf smjörið að vera alveg mjúkt. Hrærðu saman flórsykrinum og smjörinu, bættu rauðrófusafa út í til að fá fallegan lit, ásamt vanilludropunum. Notaðu rjómann til að ná þeirri þykkt á kremið sem þú vilt.
Settu smjörkremið á milli botnanna.
Bræddu í vatnsbaði súkkulaðið, rjómann og sýrópið. Helltu yfir kökuna.
Njóttu!
Helga Kvam
allskonar.is
