Á morgun, mánudaginn 15. apríl, verða tveir fundir með fulltrúum flokka og framboða sem bjóða fram í Norðausturkjördæmi til komandi Alþingiskosninga.
Áhugahópur um stjórnmál í rannsókna- og nýsköpunarhúsinu Borgum við Norðurslóð á Akureyri boðar til stjórnmálafundar í anddyri Borga milli kl. 12:00-13:30. Á fundinn mæta fulltrúar flokka og framboða sem bjóða fram í kjördæminu. Þeir munu þar svara þremur fyrirfram ákveðnum spurningum, hver fyrir sig. Að því loknu geta fundargestir borið fram spurningar.
Þær spurningar sem fulltrúarnir byrja á að svara eru eftirfarandi:
1.Hvernig viljið þið sjá stjórnarskrármálinu fram haldið á næsta kjörtímabili?
2.Hversu aðkallandi teljið þið að greiða úr skuldamálum fólks í landinu og hvernig á að nálgast það?
3.Hvernig sjáið þið fyrir ykkur framtíðina í Norðausturkjördæmi með tilliti til atvinnu¬upp-byggingar og auðlindanýtingar? Hvað teljið þið brýnast að gera?
Í upphafi mun Grétar Þór Eyþórsson prófessor við viðskipta- og raunvísindasvið HA greina stuttlega frá stöðu og horfum í kjördæminu í ljósi skoðanakannana. Fundarstjóri verður Kristín Ástgeirsdóttir framkvæmdastýra Jafnréttisstofu og fulltrúi í háskólaráði HA.
Ríkisútvarpið býður þá um kvöldið til kjördæmafundar með fulltrúum framboðanna milli kl. 19:30-21:00 í Háskólanum á Akureyri. Þetta er þriðji fundurinn af sex fyrir Alþingiskosningarnar 27. apríl. Fundarmenn svara þar spurningum kjósenda í sal, í tölvupósti eða af Facebook en fundurinn verður sendur út á Rás 2 og á vefnum ruv.is. Umsjónarmenn verða Ágúst Ólafsson og Ragnhildur Thorlacius.
Fulltrúar framboðanna á fundinum verða eftirtaldir:
Björt framtíð - Brynhildur Pétursdóttir
Dögun - Gísli Tryggvason
Flokkur heimilanna - óstaðfest
Framsóknarflokkur - Sigmundur Davíð Gunnlaugsson
Hægri grænir - Magnús Thorlacius
Lýðræðisvaktin - Sigríður Stefánsdóttir
Píratar - Aðalheiður Ámundadóttir
Regnboginn - Baldvin Sigurðsson
Samfylkingin - Kristján L. Möller
Sjálfstæðisflokkurinn - Kristján Þór Júlíusson
Vinstri græn - Steingrímur J. Sigfússon
