Árni Páll Árnason, formaður Samfylkingarinnar, tjáði sig um innanhússátökin í Sjálfstæðisflokknum á fundi með stuðningsmönnum í Samfylkingunni á Akureyri í dag. Lök staða Samfylkingarinnar í skoðanakönnunum var meðal umræðuefna og sagðist Árni Páll hafa miklar áhyggjur af því hvernig kosningabaráttan væri að þróast. Ófært væri þó fyrir Samfylkinguna að snúa af leið sem væri almenningi í landinu til góðs.
„Við erum ekki flokkur sem býr yfir töfrabrögðum, við búum ekki svo vel að vera með varaformann sem er með hnífnn i baki fomannsins sem getur fyrir vikið skammtað sér aðgang að fjölmiðlum,“ sagði Árni Páll.
Hann gagnrýndi einnig framsóknarmenn harðlega fyrir loforð þeirra um meintar lausnir í húsnæðismálum. Stefna framsóknarmanna myndi aðeins auka misrétti, t.d. milli landsbyggðar og höfuðborgarsvæðisins. 20% niðurfelling húsnæðisskulda þýddi að 57% færu til þeirra sem mest hefðu milli handanna, en aðeins fjórðungur færi til þeirra sem hefðu lægstu tekjur. Þá gagnrýndi Árni Páll Framsóknarflokkinn fyrir að hugsa ekkert um að bæta hag leigjenda og sagði Sigmund Davíð Gunnlaugsson hlaupast undan því að mæta sér í umræðu um þetta mál, t.d. hefði Árni Páll viljað mæta formanni Framsóknarflokksins í umræðu í útvarpsþættinum Sprengisandi á morgun, en Sigmundur Davíð þyrði ekki.
