Stórsýning á Mercedes-Benz verður haldin í Hofi í dag. Meðal annars verður þar sýndur nýr A-Class, sem var valinn bíll ársins 2013 á Íslandi. Einnig verða sýndir B-Class sem býður upp á einstakt aðgengi, fjórhjóladrifsbílarnir GLK og ML, auk nýja 7 manna jeppans Mercedes-Benz GL.
Sýningin fer fram milli kl. 11-16 og boðið verður upp á reynsluakstur frá kl. 15.
Einnig verður boðið upp á tónlistaratriði en KK og Maggi Eiríks munu taka lagið fyrir gesti. Sýningin er haldin í tilefni af enn nánara samstarfi Hölds og Bílaumboðsins Öskju, sem er umboðsaðili Mercedes-Benz á Íslandi.
Höldur þjónustar Mercedes-Benz á Akureyri
Höldur mun í sumar taka við þjónustu fyrir Mercedes-Benz fólks- og sendibíla á Akureyri. „Þetta er mjög spennandi og skemmtilegt verkefni og við erum fullir tilhlökkunar. Ný aðstaða Hölds sem verður að Þórsstíg 4, Akureyri, mun gjörbylta allri aðstöðu fyrir viðskiptavini og starfsmenn. Lyftum fjölgar úr 8 í 12 og sérstök forgreiningaraðstaða verður byggð við húsið. Nánast allur tækjabúnaður verður nýr og verkstæðið eitt það fullkomnasta á landinu hvað búnað og aðstöðu varðar. Útkoman verður stórbætt þjónusta við Mercedes-Benz eigendur á svæðinu. Nýja verkstæðið mun uppfylla strangar gæðakröfur Daimler til þjónustu og viðgerða og verður þá annað verkstæðið á landinu sem hlýtur þá vottun,“ segir Steingrímur Birgisson, framkvæmdastjóri Hölds.
Munum koma reglulega norður með bílana
Það er mikið af Mercedes-Benz bílum á Eyjafjarðarsvæðinu enda hafa Norðanmenn alltaf verið smekkmenn fyrir góðum bílum“, segir Jón Trausti Ólafsson, framkvæmdastjóri Öskju. „Við bindum miklar vonir við gott samstarf við Höld, enda höfum við átt farsælum viðskiptum við þá í fjölmörg ár. Höldur er eitt öflugasta bílafyrirtæki landsins, að okkar mati. Nýtt verkstæði verður sannkallaður sómi fyrir þá og rós í hnappagat okkar að þeir muni sinna viðgerðum Mercedes-Benz fólks- og sendibíla á Norðurlandi. Við teljum að það sé afar mikilvægt fyrir okkur að geta boðið upp á viðurkennda þjónustu á svæðinu. Við munum svo reglulega koma með alla bílanna norður til að kynna hér á svæðinu,“ segir í tilkynningu frá Höldi
