Nefnd á vegum foreldrafélags Hólmasólar ætlar að ræða við bæjaryfirvöld og forsvarsmenn Hjallastefnunnar til að kanna hvort raunverulegur möguleiki sé ái því að Hjallastefnugrunnskóli geti tekið til starfa á Akureyri í náinni framtíð. Freyja Dögg Frímannsdóttir, talskona foreldrafélagsins, segir að enginn tímarammi sé gefinn til þess að reyna að ná samkomulagi við bæjaryfirvöld um skólann.
Nýlega var könnun lögð fyrir foreldra barna í leikskólanum Hólmasól á Akureyri og sögðust tæplega 90% þeirra hafa áhuga á að senda börn sín í grunnskóla rekinn af Hjallastefnunni en enginn slíkur er starfandi á Akureyri. Foreldrafélag leikskólans stóð fyrir könnunni sem var netkönnnun, en Hólmasól er rekinn af Hjallastefnunni.
Spurningin sem send var til foreldranna var svohljóðandi: ˶Vilt þú eiga þess kost að geta valið Hjallastefnugrunnskóla á Akureyri fyrir skólagöngu barnsins þíns?“ Af þeim 159 foreldrum sem svöruðu svöruðu 141 játandi, 9 neitandi og 9 mynduðu sér ekki skoðun.
Könnunin var send út á 226 foreldra og svöruðu 159 könnuninni. Þetta gerir 70,3% svarhlutfall. Taka þarf þó tillit til þess að í einhverjum tilvika svöruðu báðir foreldrar barns könnuninni þó að beðið hefði verið um að einungis annað gerði það.
