JCI Norðurland býður fólki að taka þátt í leitinni að Framúrskarandi ungum Norðlendingi árið 2013. Verðlaunin eru nú veitt í fyrsta sinn en verða árlegur viðburður framvegis og vill félagið með þessu vekja athygli á vel unnum verkum í samfélaginu.
„Verðlaunin eru hvatningarverðlaun til ungs fólks sem er að takast á við krefjandi og athyglisverð verkefni. Þau eru í raun senn hvatning og viðurkenning fyrir ungt fólk sem stefnir hátt og kemur til með að hafa áhrif í framtíðinni,“ segir Svava Björk Ólafsdóttir ritari JCI Norðurlands og verkefnastjóri Framúrskarandi ungur Norðlendingur.
Opið er fyrir tilnefningar 20. apríl til 4. maí og getur hver sem er tilnefnt einstakling á aldrinum 18-40 ára. Dómnefnd mun síðan fara yfir tilnefningar og velja einn verðlaunahafa. Í dómnefnd sitja Svava Arnardóttir forseti JCI Norðurlands, Erlingur Kristjánsson forstöðumaður Fjölsmiðjunnar og situr í Íþróttaráði Akureyrarbæjar og Sóley Björk Stefánsdóttir framkvæmdastjóri akureyrivikublad.is og formaður Grasrótar.
Verðlaunin verða veitt formlega laugardaginn 18. maí kl 16 í Ungmenna-húsinu á 4. hæð í Rósenborg.
Hér má tilnefna Framúrskarandi ungan Norðlending: www.jcinordurland.is
