Nú hefur verið opnað fyrir umsóknir um Eyrarrósina sem er viðurkenning til framúrskarandi menningarverkefna á starfssvæði Byggðastofnunar. Þetta er í tíunda sinn sem Eyrarrósin verður veitt en handhafi hennar hlýtur 1.650.000 krónur og flugferðir frá Flugfélagi Íslands. Aðrir tilnefndir hljóta 300.000 krónur auk flugferða.
Það eru Byggðastofnun, Flugfélag Íslands og Listahátíð í Reykjavík sem standa að verðlaununum en þau verða veitt í febrúar 2014. Fyrri Eyrarrósarhafar eru: Skaftfell, miðstöð myndlistar á Austurlandi, Safnasafnið á Svalbarðsströnd, Sumartónleikar í Skálholtskirkju, Bræðslan, Landnámssetrið í Borgarnesi, Aldrei fór ég suður, Strandagaldur á Hólmavík, LungA, listahátíð ungs fólks á Austurlandi og Þjóðlagahátíðin á Siglufirði.
Umsækjendur um Eyrarrósina geta til dæmis verið stofnun, tímabundið verkefni, safn eða menningarhátíð. Valnefnd tilnefnir þrjú verkefni og hlýtur eitt þeirra Eyrarrósina. Dorrit Moussaieff forsetafrú er verndari Eyrarrósarinnar.
Eyrarrósin beinir sjónum að menningarlegri fjölbreytni, nýsköpun og uppbyggingu á sviði menningar og lista. Viðurkenningin er mikilvæg enda um veglega upphæð að ræða, og tilnefning til Eyrarrósar er einnig mikilsverður gæðastimpill fyrir þau afburða menningarverkefni sem hana hljóta.
Starfssvæði Byggðastofnunar er á landsbyggðinni, þ.e. Ekki í eftirtöldum sveitarfélögum:
Hafnarfjarðarkaupstað, Garðabæ, Sveitarfélaginu Álftanesi, Kópavogskaupstað, Seltjarnarneskaupstað,
Reykjavíkurborg og Mosfellsbæ.
-SBS
