Last fær fólkið í kringum mig sem elur hunda. Svo mælir kennari á Akureyri í bréfi til blaðsins. „Allt í kringum mig býr fólk sem heldur hunda. Þeim er hleypt út á hverjum degi og eru þá geltandi og gjammandi megnið af tímanum. Það er gjörsamlega óþolandi að hafa geltið í eyrunum þegar maður vaknar á morgnana og kemur heim úr vinnunni á daginn,“ skrifar kennarinn.
Lof fá blaðamenn Ak. Vkbl. fyrir áhugaverða umfjöllun um Vaðlaheiðargöng á dögunum, segir lesandi. Ekki síst hrósar hann myndatökum blaðsins. Annar lesandi sendi blaðinu vísu í tilefni af myndatexta sem fjallaði um ljósið við enda ganganna:
Allra sem halda í göngin inn / einn er viljinn ríkur, / þeir ætla að ná í endann hinn / áður en yfir lýkur.
Last fá forystumenn í Samtökum atvinnulífsins sem segja alltaf þegar verkafólk gerir kröfu um betri kjör að kröfurnar séu ekki raunhæfar, því þær muni valda svo mikilli verðbólgu. Þetta segir Norðlendingur í tölvupósti til blaðsins. „Nú líður brátt að kosningum og nú segir íhaldið að borgarstjórnin gangi á undan með að valda verðbólgu. Íhaldinu líkar hvorki Besti Flokkurinn né nýjustu fylgiskannanir Gallups. Ætlar verkalýðsforustan virkilega að syngja með þeim þessi stef?“ Spyr lesandinn.
Last fá íbúar Brekkugötu, fyrir að koma sér ekki út á dögunum til að færa bílana sína svo gatan yrði mokuð almennilega. Þetta skrifar íbúi á Akureyri. „Þeir íbúar sem gerðu það fá síðan ekki að hafa stæðin við sín hús í friði, því íbúar í næstu húsum hrúgast á þau stæði sem voru mokuð! Algjörlega óþolandi!“ Skrifar bitur bíleigandi í bréfi til blaðsins.
Lof fær íslenska þjóðin fyrir að hafa einkum varið orkunni í tvennt vegna stórsigra karlalandsliðsins í fótbolta. Annars vegar í ofsa vegna miðasölu og hins vegar ofsa út af auglýsingahléi hjá Rúv. Svo mælir kaldhæðinn lesandi blaðsins. Áfram Ísland!
