Hnotubrjóturinn er án efa einn þekktasti ballett sögunnar og er settur upp víða um heim á hverjum jólum. Svo segir í tilkynningu frá Sinfóníuhljómsveit Norðurlands en nú á laugardaginn, 30. nóvember, gefst tækifæri til að sjá þetta klassíska jólaævintýri í frumlegum og líflegum búningi. Um 350 dansarar á öllum aldri dansa um sviðið við kröftugan undirleik SN og má búast við litríkri fjölskyldusýningu þar sem öllu er til skartað, að sögn talskonu SN.
Sýningin er sett upp í samstarfi SN og dansskólans Point Dansstúdíós sem stofnaður var 2005 af Sigyn Blöndal. Sigyn er jafnframt handritshöfundur sýningarinnar. Hljómsveitarstjóri er Guðmundur Óli Gunnarsson. Þetta er í fyrsta sinn sem SN heldur danssýningu og ríkir að sögn Brynju Harðardóttur hjá SN mikil ánægja með þessa nýbreytni. Möguleikar hljómsveitarinnar hafi vaxið jafnt og þétt síðan hún flutti í Hof.
Dansnemendur hafa æft af kappi frá því í haust og mikil spenna ríkir meðal þeirra sem og hljóðfæraleikara og allra þeirra sem leggja hönd á plóginn. Hátt í 500 manns koma að sýningunni með einum eða öðrum hætti. Reiknast Akureyri vikublað það til að sá fjöldi nema um 3,6% allra íbúa á Akureyri.
“Umgjörð sýningarinnar verður hin glæsilegasta og fagmannlegasta en samhliða því sem sagan er sögð í gegnum dans og tónlist verður sviðsmyndin einstaklega lifandi þökk sé myndbandagerðarhönnuðinum Heiðari Má Björnssyni og ljósahönnuðinum Frey Vilhjálmssyni,” segir Brynja Harðardóttir, framkvæmdastjóri SN.
Uppselt er á báðar sýningar.
-BÞ
