María Pálsdóttir
Samlestur leikara er hafinn fyrir Gullna hliðið, stærstu sýningu leikársins, en verkið verður frumsýnt 17. janúar nk. hjá Leikfélagi Akureyrar. Gullna hliðið er eitt af þekktustu og vinsælustu leikritum sem skrifuð hafa verið á Íslandi. Þessi alþýðuleikur hverfist um persónu kerlingar einnar sem má ekki til þess hugsa að nýlátinn eiginmaður hennar hljóti vist í Helvíti. Hún leggur því á sig langt og strangt ferðalag til þess að koma „sálinni hans Jóns“ inn í Himnaríki. Á leiðinni mætir hún ýmsum persónum úr lífi hins annálaða syndasels og verður smám saman ljóst að það mun ekki reynast þrautalaust að koma sál hans inn fyrir hið gullna hlið.
Aftur komin heim
Aðstandendur uppfærslunnar lofa spennandi og skemmtilegri uppfærslu. Í hópi þeirra er María Pálsdóttir leikkona sem er fædd og uppalin í Eyjafjarðarsveit. Hún starfaði um aldamótin síðustu sem ung kona hjá LA en kemur nú aftur norður. María er „kerlingin“ í Gullna hliðinu.
„Já, ég hlakka mikið til,“ segir María. „Þótt samlestur sé hafinn er ég ekki búin að stíga á gamla sviðið ennþá, en það er rosa gott að koma heim.“
María segir það hafa verið nánast súrrealískt þegar hún sneri aftur á dögunum að sunnan, gekk um Akureyri og þekkti annan hvern mann. Þá sé „voða vinalegt og spennandi“ að vinna með leikstjóranum Agli Heiðari Antoni Pálssyni. „Hann er búinn að fina leið að verkinu sem virkar vel, finnst mér.“ Nánar um það segir María að ekki sé meiningin að snúa upp á þetta gamla verk með „einhverjum póstmódernískum hasar“. Það verði „vaðið inn í baðstofuna, vaðmálið og viðbjóðinn“ en beitt verði þeirri nálgun að hennar persóna, kerlingin, horfi meira í eigin barm, „díli við sína eigin púka og engla“. „Það verður spennandi að sjá hvernig útkoman verður, við vonum náttúrlega að fólk flykkist á afmælissýninguna.“
María getur þess að tvær frábærar tónlistarkonur sjái um tónlistina í verkinu, þær skipi hljómsveitina Evu. Einnig sé hafin prófun á krökkum sem syngi í englakór á sviðinu. Öllu verði tjaldað til. „Svo verður sérstaklega spennandi að eiga við djöfulinn, hvernig verður dílað við hann. Hann má ekki vera bara fyndinn.“
Spurningar sem eiga alltaf við
Talið um djöfulinn beinir huganum að því hvort Gullna hliðið sé fjölskylduskemmtun. Leikkonan játar því.
„Þetta verk hefur verið sýnt aftur og aftur en ekki í langan tíma þannig að það verður spennandi að sjá leiðina sem farin verður til að uppfærslan eigi erindi við okkur öll. Spurningar um sálarheill og ferðalög, spurningar um okkar eigin samvisku eiga alltaf við í hjörtum okkar.“
Davíð Stefánsson, höfundur verksins, fæddist að bænum Fagraskógi árið 1895 og lést á Akureyri í mars 1964. Hann er eitt af þjóðskáldum Íslendinga og hafði gífurlega mikil áhrif á íslenska ljóðagerð á tuttugustu öld. Af leikritum hans þykir „Gullna hliðið“hafa staðist tímans tönn hvað best. Þá urðu kvæðin í leikritinu landsfræg í búningi Páls Ísólfssonar sem gerði við þau þekkt lög
-BÞ
