Heyrst hefur að Íslandsstofa hafi sett verulega niður með fyrirhuguðu átaki sínu um að landsmenn sendi inn upplýsingar um leynistaði í íslenskri náttúru og víðar svo erlendir ferðamenn fái notið. Umræða um þetta hefur farið fram bæði í fjölmiðlum og á samskiptasíðum og bendir margt til að starfsfólkið hafi skotið sig í fætur og ekki hugsað málið til enda. Eitt af því sem rætt hefur verið er að þótt Íslandsstofa segi að ekki verði kjaftað frá stöðum og umferð erlendra ferðamanna beint þangað nema í þökk heimamanna sjálfra, hljóti sú staða hæglega að koma upp að fólk verði ósammála um hvaða staði beri að vernda og njóta skuli takmarkaðrar umferðar, sumir staðir séu nánast friðhelgir nema sem hlunnindi fámennra hópa. Hefur sem dæmi verið nefnd í umræðunni gjá nokkur með heitu vatni á Norðurlandi sem meira að segja Fréttablaðið fjallaði um á forsíðu fyrir nokkru en gaf ekki upp staðsetningu hennar, svo heimafólk fengi áfram notið hennar án þess að ferðamenn yfirfylltu staðinn með þar til gerðri slysahættu og ágangi sem stefnt gæti náttúruperlunni í voða. Hefur heyrst að skýringar Íslandsstofu sem dregið hefur í land undanfarið og túlkað verkefnið með öðrum hætti en í upphafi séu eftiráskýringar í stað þess að segja einfaldlega: Afsakið, okkur varð á í messunni…
Heyrst hefur að gangamenn inni í Vaðlaheiði séu kampakátir með hve vel gengur að sprengja sér leið austur í átt til Mekka. Göngin eru nú á sjöunda hundrað metra á lengd en þau lengdust um 79 metra í síðustu viku sem er met. Einnig er unnið við austurhliðið í Fnjóskárdal og styttist í að 10% ganganna hafi verið grafin…
Heyrst hefur að sú staða sé óvænt komin upp meðal Norðlendinga sem annarra landsmanna að fólk sitji nú klukkustundum saman yfir sjónvarpsdagskránni. Þetta kemur mörgum á óvart og hefur truflað virkni heima fyrir, svo sem þá sem ætluðu bara að hanga á facebook eins og vanalega eða hina iðnari sem annars hefðu prjónað eða þæft ullarsokka fyrir veturinn án truflunar. Hefur heyrst að sunnudagskvöld séu orðin sérlega skæð hvað þetta varðar með því að tónlistarþáttur íslenskur hafi þar slegið í gegn og sett ný viðmið í umfjöllun um klassíska tónlist. Þá skora norsku þættirnir um Hálfbróðurinn feitt og ekki spillir tenging þáttanna við Ísland fyrir og einnig má nefna misathyglisverða þætti Ragnhildar Steinunnar um Ísfólkið. Hefur heyrst að næsta þjóðarátak verði að senda Páli Magnússyni útvarpsstjóra mótmæli við því að ítrekað sé nú boðið upp á gott sjónvarp, kvöld eftir kvöld. Hefur heyrst að m.a.s. bloggarinn Eiður Guðna, fyrrum fréttamaður og sendiherra, sé orðinn sáttur við dagskrána, en hann hefur staðið í fyllkingarbrjósti gagnrýnenda síðari misseri…
