Í dag kl. 15 opnar í Ketilhúsi sýning þriggja listamanna, þeirra Bjarna Sigurbjörnssonar, Jóns Óskars og Ragnheiðar Guðmundsdóttur. Blaðamaður lagði leið sína í Ketilhúsið stuttu fyrir opnun og spjallaði við Ragnheiði um hennar hluta af sýningunni sem nefnist Elska ég mig samt?
„Sýningin mín er tileinkuð konum. Formæðrum mínum, konunum í lífi mínu og öðrum konum. Ég er að fjalla um þau sár og ör sem við allar berum eftir gönguna í gegnum lífið og sem berast á milli okkar í gegnum tengsl okkar og hvernig fyrirgefningin er lykillinn að heiluninni,“ segir Ragnheiður.
Elska ég mig samt?
„Ég hef lengi velt því fyrir mér hvað það þýðir að elska sig sjálfa. Raunverulega; ekki bara að segja það heldur virkilega finna það. Hvers vegna höfnum við okkur stöðugt, finnst við vera ófullkomnar og ekki nógu góðar? Erum við ekki fullkomnar núna eins og við erum? Eftir hverju erum við alltaf að bíða? Ef við getum elskað okkur núna, sama hvað á gengur, verðum við frjálsar.“
Amma mín fyrirmynd
Ragnheiður rekur ættir sínar norður en móðuramma hennar og afi, Herdís og Ingólfur, bjuggu að Fornhaga í Hörgárdal og þaðan á hún margar góðar minningar og sótti innblástur til ömmu sinnar. „Hún var svo sjálfstæð og sterk kona, um tvítugt fór hún ein til Noregs í garðyrkjuskóla og hún starfaði við blómaræktun allt sitt líf. Hún var ein af þessum konum sem stóð með sjálfri sér og því sem hún vildi. Mér hefur sérstaklega mikið verið hugsað til hennar þegar ég var að vinna verkin við þessa sýningu, hún er mér svo mikil fyrirmynd.“
List og heilsa
Ragnheiður er menntaður textílhönnuður frá Listaháskóla Íslands og hefur mikið velt fyrir sér áferð efna og þróað hugmyndir sínar með blandaðri tækni sem liggur á mörkum textíls og málverks. Þessi þróunarvinna leiddi til djúprar íhugunar um efnisgerð og var niðurstaðan sú að efnið væri sjálfstæð eigind sem hægt væri að meðtaka sem myndlist á fagurfræðilegum forsendum. Ragnheiður hefur mikinn áhuga á náttúrulækningum og stundaði nám í þeim fræðum um tíma. Vangaveltur hennar um hlutverk listamannsins, sem og hvers vegna og hvernig við lifum, rann síðar saman við áhuga hennar á heilsu og andlegum fræðum. Útkoman er myndlist þar sem skrifaður texti hverfur undir yfirborð efnanna í vinnsluferlinu og viðfangið brýst fram í formi vefja, bývaxs, útsaums og rifinna grisja. „Þetta eru lífsins ör og sár sem gefa til kynna sorgina, sársaukann og gleðina sem fylgir því að yfirvinna andstreymið,“ segir Ragnheiður. Í verkunum er einnig stundum að finna möntrur sem kyrjaðar eru í sköpunarferlinu.
Tvær ólíkar sýningar
Sýning Ragnheiðar er á efri hæð Ketilhússins en á neðri hæðinni sýna myndlistarmennirnir Bjarni og Jón Óskar verk sem virka mikil andstæða við verk Ragnheiðar. Sýning þeirra, sem samanstendur af verkum sem máluð eru á stóra fleka, er kraftmikil og stórkallaleg. Sýningarnar fara þó einkennilega vel saman.
-SBS
