Brynhildur Pétursdóttir, þingmaður Bjartrar framtíðar í Norðausturkjördæmi telur að margt í umræðunni um Evrópusambandið einkennist af hræðsluáróðri. Þetta kom fram í þingræðu sem Brynhildur flutti á Alþingi í síðustu viku. Hún vill ljúka viðræðum við ESB og leggja samning í dóm þjóðarinnar.
„Við teljum að það eigi alltaf að taka afstöðu í málum út frá bestu vitneskju. Við getum ekki tekið afstöðu í þessu máli eða öðrum út frá getgátum. Mér finnst margt í umræðunni um Evrópusambandið skrítið og mér finnst merkilegt hvað er langt gengið í að ala á ótta, Evrópusambandið er gert tortryggilegt með ýmsum ráðum og kennt um allt sem miður fer í álfunni. Þannig finnst mér ein fullyrðing lýsa best þessum hræðsluáróðri. En það er „Sjáiði bara Grikkland“ sjáiði bara Spán og Portúgal.“
Brynhildur segist ekki átta sig á að Grikkland komi aðild Íslands að ESB sérstaklega við. „Hvenær byrjuðum við að líkja okkur saman við Grikkland eða lönd í Suður-Evrópu. Jú við eigum það vissulega sameiginlegt með þessum löndum að hafa kosið yfir okkur stjórnvöld sem stóðu sig illa en það hefur ekkert með Evrópusambandið að gera. Þjóðir Evrópu bera algerlega á ábyrgð á eigin stjórnvöldum,“ sagði Brynhildur.
„Væri ekki nær að við segðum þá „sjáiði bara Svíþjóð“, sjáiði bara Danmörku, sjáiði bara Finnland, og sjáiði bara Belgíu, Holland, Þýskaland, Lúxemborg eða Austurríki? „Sjáiði bara Grikkland“ eru ekki boðleg rök. Mörgum löndum í Evrópusambandinu vegnar vel og öðrum vegnar verr. Þannig er það.
Evrópusambandið er aldeilis ekki gallalaust, það er alveg ljóst, en ræðum þá raunverulegu ókostina sem fylgja því að ganga í Evrópusambandið, því þeir eru alveg fyrir hendi. Við þurfum bara að meta hvort kostirnir séu fleiri en gallarnir.“
Björt framtíð telur það mikil mistök að Gunnar Bragi hafi leyst samninganefndina frá störfum en Brynhildur telur hana hafa unnið frábært starf. Ríkisstjórnarflokkarnir hafi lofað þjóðinni þjóðaratkvæðagreiðslu um það hvort halda eigi viðræðum áfram. Nú virðist hins vegar lítill áhugi á því þótt ekki hafi vantað áköll allt síðasta kjörtímabil um að þjóðin fengi að segja sitt.
-BÞ
