Í haust eru 25 ár liðin síðan Fjölskylduráðgjöf var formlega sett á stofn við heilsugæsluna á Akureyri samkvæmt ákvörðun bæjarstjórnar Akureyrar og stjórnar stöðvarinnar. Frá upphafi var lögð áhersla á að samþætta starfið öðrum þáttum heilsuverndar til að efla fjölskylduforvarnir, sérstaklega í tengslum við mæðra- og ungbarnavernd og að þróa þverfaglega samvinnu, til að geta betur mætt mismunandi þörfum barnafjölskyldna fyrir stuðning eða úrvinnslu áfalla.
Fyrr á þessu ári gerði Háskólinn á Akureyri, í samvinnu við Fjölskylduráðgjöfina, fyrstu rannsóknina sem gerð hefur verið á gagnsemi þjónustunnar fyrir notendur. Niðurstöður byggja á mati og svörum alls 250 einstaklinga, þ.e. um 60% skjólstæðinga Fjölskyldu-ráðgjafar á árunum 2011 og 2012, 18 ára og eldri, sem treystu sér til og gátu tekið þátt. Helstu niðurstöður rannsóknarinnar að mati höfunda skýrslunnar eru þær að 76% þátttakenda voru mjög eða frekar ánægðir með þá þjónustu og ráðgjöf sem þeir fengu og 78,4% (alls 194 einstaklingar) hafa fundið fyrir jákvæðum breytingum í kjölfarið. Það sem þeir telja að helst þurfi að bæta er að stytta biðtíma eftir þjónustu og fjölga starfsfólki svo unnt sé að efla þjónustuna. Margt kemur fram í skýrslunni sem vekur áhyggjur, ef ekkert er að gert, ekki síst niðurskurður en því er haldið fram í rannsókninni að sparnaðaraðgerðir á þessum sviðum þjóðfélagsins skili ekki tilætluðum árangri.
„Ef ekki er gripið inn í vandamál einstaklinga á frumstigi með góðri grunnþjónustu, er líklegra að vandamál þeirra séu orðin alvarlegri þegar þeir leita eftir aðstoð. Það getur leitt af sér erfiðari og kostnaðarsamari úrlausnir en hefði þurft, ef gripið hefði verið inn í vandamál einstaklinga fyrr,“ segir m.a. í rannsókninni.
-BÞ
