Heyrst hefur að Oddur Helgi Halldórsson bæjarfulltrúi á Akureyri hafi vakið blendnar tilfinningar hjá Facebook-vinum sínum eftir að hann birti á vegg sínum mynd Harðar Geirssonar af C-17 flugvél frá bandaríska hernum sem flutti í síðustu viku búnað til Akureyrar í tengslum við æfingar og loftrýmisgæslu í nóvember. Flugvélin er herflugvél sem rifjar upp deildar meiningar meðal bæjarbúa á Akureyri um orrustuþoturnar sem ítrekað raska ró fólks í Eyjafirðinum fagra. Margir virðast þó hafa gaman af því að vera minntir á stríðsrekstur með hávaða orrustuvélanna og hefur heyrst að Oddur sé í þeim hópi því hann skrifaði á Facebook sína með mynd af herflugvélinni: „Alltaf gott að sjá verndarann“…
Heyrst hefur að mörgum framsóknarmanninum í norðlensku héraði sé ekki skemmt vegna þeirra ummæla Láru Hönnu Einardóttur, aktívista og sjálfstæðs rannsóknarblaðamanns og bloggara sem beindust gegn fyrsta þingmanni kjördæmisins í vikunni, Sigmundi Davíð Gunnlaugssyni. Lára Hanna er að rannsaka ummæli forystufólks ríkisstjórnarinnar fyrir kosningar og bera þau saman við efndir. Hún skrifaði m.a. í athugasemd: „Nú er ég komin í kjördæmaþátt Stöðvar 2 í Norðausturkjördæmi - þangað sem SDG flutti lögheimili sitt á eyðibýli til að bjóða sig fram í kjördæminu. Allir vita að slíkt er svik og spilling - en láta sem ekkert sé. Merkilegt.“
Heyrst hefur að gamlar væringar milli Kristjáns Þórs Júlíussonar heilbrigðisráðherra og Þorvaldar Ingvarssonar hafi verið rifjaðar upp í tengslum við ráðningu nýs forstjóra Landspítalans. Þorvaldur sem hrökklaðist á brott frá Akureyri eftir mikinn blús sem tengdist samstarfsvanda á spítalanum og getuleysi fyrri heilbrigðisráðherra til að taka á vandanum þótti vel koma til greina sem forstjóri Lansans og var hans nafn nefnt opinberlega. Hefur hins vegar heyrst að Kristján Þór hafi aldrei fyrirgefið Þorvaldi þegar hann hugðist marka sér spor í landsmálapólitíkinni fyrir Sjálfstæðisflokkinn og bauð sig fram í fyrsta sæti til höfuðs Kristjáni Þór um árið. Fyrir vikið hafi sú hugmynd verið langsótt…
Heyrst hefur að Andrea Hjálmsdóttir, bæjarfulltrúi VG, sé ekki hress með hvernig fjallað var um Akureyri í Mogganum um síðustu helgi. Blaðið gaf þá út sérstakt Akureyrarblað en samkvæmt greiningu Andreu var talað við 16 karla en aðeins tvær konur. Valgerður Bjarnadóttir, fyrrum jafnréttisstýra hefur lagt orð í belg einnig og segir: „Er þetta ekki skrítið? Hvað eigum við að gera til að opna augu þeirra? Það hlýtur að vera til leið.“
