Vínilplötur og plötuspilarar hafa gengið í endurnýjun lífdaga síðustu misserin og má nú finna plötuspilara á mörgum heimilum þar sem geislaspilarar og geisladiskar hafa áður vermt hillur. Finnbogi Sigurður Marinósson á mikið safn vinylplatna en á laugardag ætlar hann að selja stóran hluta safnsins á Glerártorgi. Í safni Finnboga kennir ýmissa grasa, þar er að finna popp, rokk, þungarokk, kántrí, blús, soul og fleiri tónlistarstefnur. „Það er svolítið merkilegt hvað vínylplöturnar hafa komið til baka og fyrir gamlan hund eins og mig sem hefur fylgst með þessu síðan upp úr 1970 þá gleður þetta hjartað,“ segir Finnbogi.
En hvers vegna ertu að selja plöturnar þínar?
„Safnið er búið að vera í geymslu í kössum í nokkur ár og nýlega var ég beðin um að sækja það svo ég fékk vin minn til að bera þetta með mér. Það voru 56 bananakassar, og þeir eru alls ekki léttir, svo ég sagði við sjálfan mig, æ af hverju að vera að bera þetta á milli staða þegar ég á aldrei eftir að hlusta á þetta allt aftur, svo ég ákvað að það væri bara óþarfi að geyma þetta í safni þegar einhver gæti verið að hlusta á plöturnar. Svo ég fór í gegnum bunkann og tók út þær plötur sem ég er tilbúinn til að deila með öðrum, þetta eru um 800 plötur.“
„Ég ætla að vera fyrir framan BT verslunina á laugardaginn frá kl. 11 og þar til vonandi allt er selt, ég vona að minnsta kosti að ég þurfi ekki að bera þetta allt til baka. Þarna verður tækifæri fyrir fólk að eignast plötur á góðu verði, nýjar vinylplötur eru nefninlega mjög dýrar beint út úr búð, mun dýrari en geisladiskar, svo ég trúi því að fólk nýti sér þetta.“
-SBS
