Mikill fjöldi jarðskjálfta hafa verið á Grímseyjarbeltinu síðasta sólarhringinn og margir hverjir allsnarpir og hafa fundist víða á Norðurlandi. Hátt í 500 skjálftar hafa verið á svæðinu síðustu 24 tímana og þar af rúmlega 60 stærri en 3 og 7 stærri en 4. Tveir snarpir skjálftar urðu um ellefu leytið í gærkvöldi, sá fyrri 4,7 að stærð kl. 22:52 stuttu síðar kom annar 4,6 að stærð.
Upptök skjálftanna eru á brotabelti sem liggur frá Öxarfirði norður fyrir Grímsey, svonefndu Grímseyjarbelti.
Á vef Almannavarnadeildar ríkislögreglustjóra segir að jarðskjálftahrinur á þessu svæði verði með nokkurra ára millibili. Þar hafa orðið jarðskjálftahrinur af svipuðu tagi árin 1969, 1974, 1980, 1986, 1994 og 2002. Þær hrinur stóðu allt frá nokkrum dögum og uppí nokkrar vikur. Ekki er þó hægt að spá fyrir um framhaldið á þessari hrinu og ekki er hægt að útiloka að hrinan hafi frekari áhrif á nærliggjandi sprungukerfi með aukinnni virkni suðaustan og norðvestan við meginskjálftann. Fleiri stórir skjálftar geta því fylgt í kjölfarið en ómögulegt er að segja fyrir um það.
Á myndinni hér fyrir ofan, frá Veðurstofunni, má sjá upptök tveggja stærstu skjálftanna sýnd með svörtum stjörnum.
Nokkrir aðrir skjálftar í skjálftaröðinni eru sýndir með rauðleitum hringjum.
Meginskjálftinn, sem átti sér stað kl. 00:59 aðfararnótt þriðjudags er á norðlægu vinstrihandar sniðgengi, samanber svarthvíta táknið á kortinu. Það þýðir að vinstri brún misgengisins fer til suðurs en sú hægri til norðurs (sjá teikningu t.h.). Næst stærsti skjálftinn, sem varð um kl. 9 í gærmorgun, er um 7,5 km norðvestan við meginskjálftann og er á siggengi (sjá teikningu t.v.) sem bendir til spennubreytinga í nágrenni stóra skjálftans.
Allar myndir eru fengnar af vef Veðurstofunnar.
Að lokum má svo kynna sér hér viðbrögð við jarðskjálftum á myndbandi sem slysavarnafélagið Landsbjörg hefur gert.
