Laugardaginn 20. júlí nk kl. 13-14 verður fjölskyldujógatími á grænu túni í góðu veðri við sólúrið í Kjarnaskógi. Það er Arnbjörg Kristín Konráðsdóttir, jógakennari, sem stendur fyrir viðburðinum en hún hefur víða haldið fjölskyldujógatíma og meðal annars kennt 6-8 ára börnum í Hörðuvallaskóla jóga.
„Við gerum jógaæfingar, förum í leiki, syngjum, hugleiðum og slökum vel á í lokin,“ segir Arnbjörg og segir að áherslan sé lögð á að gera sitt besta, tengjast í kærleika, hlæja saman og fara brosandi inn í restina af helginni. „Það er miðað við að fimm ára og eldri geti tekið fullan þátt en yngri börn eru algjörlega velkomin og þurfa þá kannski aðstoð foreldra í tímanum. En þau taka vissulega allt saman inn á sinn hátt þessar elskur og gera eins og þau geta“.
Verð er 500 kr. pr. einstakling og það getur verið gott að komameð teppi til að hafa ofan á allri fjölskyldunni í slökun. „Eins er alveg kjörið að koma með nesti og borða í lokin,“ segir Arnbjörg og biður fólk um að skrá sig fyrirfram með tölvupósti á netfangið akk@graenilotusinn.is
