Vísbending er um að lestrarkunnátta nemenda í tveimur fyrstu bekkjum grunnskólans á Akureyri sé ekki sami vandi og nú er ræddur í Reykjavík. Aðeins 63% sjö ára barna í Reykjavík geta lesið sér til gagns samkvæmt lesskimun sem gerð var síðasta vor. Mikill munur er milli skóla í höfuðborginni en ef rýnt er í gögn frá Akureyri kemur á daginn að hlutfall þeirra sem hafa verið í mestum vandræðum með læsti fer minnkandi á sama tíma og hinir hóparnir halda velli.
Í tilefni frétta sem sagðar hafa verið um dalandi lestrarfærni reykvískra barna í 2. bekk hefur Miðstöð skólaþróunar Háskólans á Akureyri tekið saman tölur úr læsisprófum í Akureyrarskólunum undanfarin átta ár. „Ég held að við megum nokkuð vel við una hvað árangur nemenda varðar hér á Akureyri. Ánægjulegt er að sjá að það fækkar í þeim hópi nemenda sem hvað slakast standa á meðan árangur í efri hópum helst nokkuð stöðugur u.þ.b. 75% á því prófi sem Reykjavíkurborg skoðar,“ segir Gunnar Gíslason, fræðslustjóri á Akureyri.
Í hverjum skóla er starfandi amk. einn leiðtogi í læsi sem fylgir niðurstöðum skimana eftir í vinnu með kennurum og leiðir læsiteymi innan skólans. Kennarar í grunnskólum vinna saman að læsiskennslu bæði innan skóla en einnig hittast kennarar milli skóla. Mikill áhugi og metnaður er sagður meðal kennara yngstu barna á læsisnámi nemenda.
Ekki er þó hægt að bera saman niðurstöður fyrir Akureyri saman við niðurstöður fyrir Reykjavík með beinum hætti, því ekki er um sama prófið að ræða. Einnig þarf að hafa í huga að ekki er notaður sami kvarði eða flokkun við útreikninga. Á Akureyri er miðað við að nemendur sem ná yfir 60% árangri standi vel í lestri en viðmiðið er 65% í Reykjavík. Ástæðan er sú að á Akureyri er prófið lagt fyrir nemendur fyrr á skólaárinu, sem nemur tveimur mánuðum, og talsverður munur hjá börnum á þessum aldri.
Hins vegar sýna mælingar að lestrarkunnáttu hrakar ekki á Akureyri síðari misseri heldur eykst hún þvert á móti frá ári til árs.
-BÞ
