Fjárhagsáætlun Akureyrarbæjar sem L-listinn lagði fram til kynningar nýverið fær falleinkunn hjá bæjarfulltrúum minnihlutans. Stór orð falla um að rekstur bæjarsjóðs bæði fram og aftur í tímann sé vondur.
Geir Kristinn Aðalsteinsson
Geir Kristinn Aðalsteinsson, forseti bæjarstjórnar Akureyrar, segir að fjárhagsáætlun næsta árs geri ráð fyrir að bæjarsjóður verði rekinn með hagnaði og áhersla lögð á að greiða niður skuldir. „Þegar bornir eru saman ársreikningar fyrir árið 2009 og áætlun fyrir árið 2014 má sjá að skuldir munu lækka verulega á kjörtímabilinu.“
Þetta eru að sögn oddvita L-listans jákvæð teikn eftir erfiðan rekstur undanfarin ár. Það mun taka sinn tíma að ná jafnvægi í reksturinn eftir mikla framkvæmdagleði á síðasta kjörtímabili og nægir þar að nefna framkvæmdir eins og Hof, Þórsvöllinn og íþróttahúsið við Giljaskóla en þessi mannvirki komu af fullu afli inn í reksturinn á þessu kjörtímabili.“
Verulega hefur verið dregið úr byggingaframkvæmdum undanfarin ár enda er bærinn orðinn afar vel settur af mannvirkjum að sögn Geirs Kristins. „Vissulega hefur mikið fé verið sett í íþróttamannvirki bæjarins á liðnum árum og alltaf má deila um hvort nóg er gert eða of mikið. Þessi íþróttamannvirki eru þó öll gríðarlega vel nýtt alla daga vikunnar og draga mörg hver mikið af gestum til bæjarins, enda eru hér haldin fjölmörg íþróttamót á hverju ári sem eru bænum til sóma. Íþróttalíf á Akureyri er gríðarlega öflugt og þar vegur mikið og óeigingjarnt sjálfboðaliðastarf þungt. Íþróttirnar hafa mikið forvarnargildi fyrir börn og unglinga og því á það að vera stolt hvers bæjarfélags að búa yfir öflugu íþróttalífi.“
-BÞ
