Hljómsveitin Kjass. Mynd: Nanna Dís
Hljómsveitin Kjass sendi nýlega frá sér sín fyrstu lög en hljómsveitin hefur starfað í um hálft ár. Fanney Kristjánsdóttir, söngkona sveitarinnar er uppalin í Mývatnssveit en stundar nú söngnám við FÍH. „Við spilum frumsamin lög en höfum líka gert eigin útsetningar á íslenskum þjóðlögum og hefðbundnum sönglögum. Svo spilum við líka allskonar tónlist sem okkur finnst skemmtileg,“ segir Fanney en hljómsveitin hefur starfað saman í rúmlega hálft ár og komið fram á tónleikum norðan- og sunnan heiða. „Við stefnum á að spila á Norðurlandinu aftur í sumar enda voru viðtökurnar mjög góðar í fyrra,“ segir Fanney.
Hér fyrir neðan má hlusta á lagið Til ömmu en það var Jóna Kristjana Hólmgeirsdóttir sem samdi textann til ömmu sinnar Stínu og ömmu sinnar Lilju. Fanney samdi lagið og segist hafa leitast við að fanga barnslega orku, gleði og einlæga ást barns til ömmu sinnar. „Í myndbandið notuðum við svo myndir úr fjölskyldualbúmunum okkar og myndir frá vinum og kunningjum. Elsta myndin er frá árinu 1930 af heimilisfólkinu í Baldursheimi í Mývatnssveit, á þeirri mynd eru afabræður mínir og amma þeirra ,“ segir Fanney.
Hljómsveitina skipa, auk Fanneyjar, Anna Gréta Sigurðardóttir á píanó, Mikael Máni Ásmundsson á gítar, Óskar Kjartansson á trommur og Birgir Steinn Theodorsson á bassa. Róbert Steingrímsson sá um upptökur og hljóðvinnslu á lögunum.
Annað lag sem hljómsveitin hefur sent frá sér er útsetning Fanneyjar á hinu þekkta þjóðlagi Krummi svaf í klettagjá. „Ég vildi að útsetningin endurspeglaði íslenskan vetrardrunga og það hungur sem margur þarf að þola í gegnum hin ýmsu skeið lífsins og hversu langt menn og dýr eru tilbúin að ganga á hlut annarra til að fá það sem okkur hungrar í,“ segir Fanney.
