Bæjarhátíðin Akureyrarvaka verður haldin um helgina. Akureyrarvaka fer fram í tilefni afmælis Akureyrarbæjar, en vond veðurspá hefur orðið til þess að ekki er alveg víst hvort fyrirhuguð dagskrá mun standa óbreytt. Hápunktur hátíðarinnar er fyrirhugaður á laugardagskvöld þegar efnt verður til litríkrar listaveislu með alþjóðlegum blæ á Ráðhústorgi, í Listagilinu og víðar um bæinn. Dagskrá laugardagsins lýkur með útitónleikum hljómsveitarinnar Retro Stefson og gesta á risasviði neðst í Listagilinu kl. 21.00. Þema Akureyrarvöku þetta árið er fjölmenning og ræddi blaðið við Jón Gunnar, framkvæmdastjóra hátíðarinnar.
Hvers vegna fjölmenning, Jón Gunnar?
„Fólkið sem býr á Akureyri eru Akureyringar og gerir bæinn að þeim bæ sem hann er. Á síðastliðnum áratugum hefur Akureyrarbær vaxið ört og þétt, í dag eru Akureyringar frá yfir 60 þjóðlöndum. Þessu á að fagna og hvað er betri vettvangur til þess en afmælishátíð Akureyrarbæjar? Frá hverju landi koma ýmsar menningahefðir og siðir, til að mynda er þorrinn alíslensk menningarhefð. Súrsaðir hrútspungar, kæst skata og siginn hákarl. Við eigum okkar hátíðir til að minna okkur á íslensk gildi. En í fjölmenningarsamfélaginu Akureyri erum við svo heppin að geta lært hefðir og siði annarra þjóða sem hér búa.“
Á dagskrá Akureyrarvöku má finna alþjóðlegt eldhús þar sem þjóðréttir tugi landa verða kynntir. Boðið verður upp á alþjóðlegan nytjamarkað og alþjóðlega leiki. Á Ráðhústorginu verða heimstónleikar og kúbverskur djass, við Backpackers verður reggí, bluegrass, balkneskt rokk og svo mætti lengi telja. Dagskráin er lituð fjölmenningu, og þeirri fjölbreyttu menningu sem býr í samfélaginu okkar. Bæklingur hátíðarinnar er m.a.s. hannaður af Akureyringnum Vaivu Straukaite.
„Með fjölmenningu er ekki einungis átt við fjölþjóðlega menningu, heldur einnig fjölbreytta menningu, t.d eru vísindi menning og í ár verður boðið upp á Vísindasetur í Rósenborg.“
Hátíðinni er ætlað að hefjast á „suðrænni og seiðandi“ stemningu í Lystigarðinum. Miðað við veðurspána, er það nokkuð eins og að hawai-búum dytti í hug að hefja sína bæjarhátíð með norðurheimskautablæ?
„Eflaust. Norðurljósahátíð væri mjög framandi fyrir Hawai búa, líkt og suðræna sveiflan er framandi fyrir okkur. Í Lystigarðinum sjálfum er blómaflóra og jurtir frá öllum heimshornum. Garðurinn að sumri til er ævintýralegur og hvað er rómantískara en suðræn og seiðandi dagskrá í Lystigarðinum okkar? Á dagskránni mun Karlakór Akureyrar-Geysir og Kvennakór Akureyrar stilla sér upp í sitthvoru rjóðrinu innan um gosbrunna og blómahaf, þau verða klædd litríkum fötum og syngja suðræna söngva. Tælenskur danshópur dansar í kringum bæjarbúa og Birna og Baldur leika rómantísk djasslög. Leikarar fara með ljóð eftir Pablo Neruda og fleiri rómantísk ljóðskáld. Hljómsveitin Cuba Libre endar dagskrána í Lystigarðinum með salsasveiflu.“
Sérstætt combó í Gilinu
Það hefur verið kynnt sem hápunktur Akureyrarvöku að Retro Stefson spilar í gilinu á laugardagskvöld á stóru sviði. Þeir verða gestgjafar og bjóða á svið þau Helenu Eyjólfs og Pálma Gunnarsson. Var ekkert mál að berja saman þetta sérstæða combó?
„Ísland á líklega heimsmet í útihátíðum miðað við höfðatölu. Hverja einustu helgi í allt sumar hafa verið haldnar bæjarhátíðir út um allt land. Gestir bæjarhátíða vilja verða vitni að einhverju einstöku. Í stað þess að bjóða upp á hefbundna dagskrá er skemmtilegra að taka áhættu. Aðalnúmer kvöldsins er Retró Stefsson, ein vinsælasta hljómsveit Íslands, sem hefur síðastliðið árið verið á tónleikaferðalagi út um allan heim. Okkur langaði að sjá það verða að veruleika að Helena Eyjólfs tæki lag með Retró Stefson eða heyra Retró spila lag eftir Pálma Gunnarsson, allt eru þetta einstakir tónlistarmenn og Akureyringum og auðvitað landsmönnum öllum þykir afar vænt um þau tvö. Tilraunin er áhættusöm og gæti misheppnast. En ef hún heppnast eins og maður ímyndar sér þá geta Akureyringar sagt; ég var þarna, ég var þarna þegar Helena Eyjólfs steig á svið með Retró Stefson.“
Jón Gunnar, þú hefur ekki áður verið framkvæmdastjóri Akureyrarvöku. Hugsaðir þú þegar þér var boðið djobbið: mig langar núna að gera eitthvað allt annað en það hefur verið gert?
„Nei. Akureyrarvaka hefur hingað til verið mjög velheppnuð og vel stjórnað. Síðastliðin ár hafa Guðrún Þórs og Hulda Sif verið í framkvæmdastjórn. Í ár kem ég inn fyrir Gunnu sem eignaðist barn í sumar. Hulda er mjög klár og kann á praktíkina á bakvið hátíðina, ég reyni að koma inn með mína listrænu sýn. Í fyrra var mjög velheppnuð Akureyrarvaka á afmælisárinu. Hátíðin í ár er náttúrulega minni en ég geri mitt besta til að skila minni vinnu eins vel og ég get.
Ég nálgast hátíðina líkt og hvert leikstjórnarverkefni sem ég tek að mér og vonast til að skila eins góðri sýningu og ég get.“
Engin flugeldasýning í ár
Verður flugeldasýning? Sumir segja að bæjarhátíðir snúist aðallega um brjálaða flugeldasýningu?
„Ein flottasta flugeldasýning sem hefur verið haldin, var í fyrra á afmælisárinu, það þyrfti mikið til að toppa hana. Flugeldasýningar eru á nánast öllum bæjarhátíðum og var nú síðast hér á Akureyri um verslunarmannahelgina. Þegar við hófum störf og fórum yfir fjárhaginn var ljóst að annaðhvort yrði boðið upp á litla dagskrá og stóra flugeldasýningu eða fjölbreytta dagskrá, flotta hljómsveit á lokakvöldinu og sleppa flugeldasýningunni. Sem listrænn stjórnandi átti ég ekki erfitt með að velja; það verður engin flugeldasýning í ár. En í staðinn er boðið upp á fjölbreytta dagskrá helgaða fjölmenningu, tónleika með Retro Stefson í Gilinu og magnað lokaatriði þar sem eldur verður í aðalhlutverki.“
Í könnun félagsvísindadeildar Háskólans á Akureyri fyrir tveimur árum mældist Akureyrarvaka langvinsælasta og óumdeildasta bæjarhátíðin meðal Akureyringa, hvað telur þú skýra það?
„Skemmtanagleði Akureyringa skýrir það eflaust. Akureyrarvaka er menningarleg bæjarhátíð af bestu gerð, fjölbreytt listræn dagskrá sem allir ættu að finna eitthvað við sitt hæfi.“
-BÞ
