Útgerðarfélagið Hvammur í Hrísey hefur ákveðið að segja upp öllu starfsfólki sínu í landi frá og með næstu mánaðarmótum. Við fyrirtækið starfa 13 í vinnslu og tveir sjómenn. Uppsagnirnar gilda frá og með 1. júní.
Hvammur er risastór vinnuveitandi ef hann er settur í samhengi við íbúafjöldann sem býr í Hrísey. 13 starfsmenn eru 7.5% íbúa Hríseyjar. Til að setja þetta í samhengi þá er þetta líkt og að 1.350 starfsmenn á Akureyri myndu missa vinnuna á einu bretti, eða um 15.000 íbúar höfuðborgarsvæðsins.
Þetta er því mikil blóðtaka fyrir atvinnulíf í eynni. Jóhann Pétur Jóhannsson, einn eigandi Hvamms sagði við akv.is að ekki sé verið að leysa fyrirtækið upp. „Það er bara ekki hægt að reka fyrirtækið við óbreyttar aðstæður. Ástæðurnar eru margar og mismunandi. Við erum bara komin á þann stað að reksturinn stendur ekki undir sér“.
„Við vorum nú bara að tilkynna starfsfólki þetta í morgun, þessar uppsagnir taka gildi 1. júní, kannski breytist eitthvað í millitíðinni. Við höfum verið að leita lausna undanfarið“ Segir Pétur Jóhann í samtali við akv.is
