Pascal Heyman, sem nýlega lauk störfum sem verkefnastjóri hjá Öryggis- og samvinnustofnun Evrópu, varar Íslendinga við norðurljósarannsóknum Kínverja í Reykjadal í Þingeyjarsýslu.
„Kínverjar gera ekkert nema það sé vel ígrundað. Það að Kínverjar komi hingað og vilji rannsaka himininn fyrir ofan Ísland lítur grunsamlega út. Við vitum af áhuga þeirra á norðurslóðum og ásælni þeirra í ítök víðsvegar um heiminn. Íslendingar verða að stíga varlega til jarðar,“ segir Heyman í samtali við Akureyri vikublað.
„Til að mynda yrði afar auðvelt fyrir Kínverja að fylgjast náið með öllu því sem gerist yfir himninum á Íslandi með nútímatækni. Við verðum einnig að átta okkur á að lofthelgin yfir Íslandi er í raun lofthelgi NATÓ. Því verð ég að segja að menn ættu að fara afar varlega í þessum efnum.“
Heyman telur að Íslendingar ættu að styrkja samstarfið gríðarlega við grannríki sín í Skandinavíu. Norræna samstarfið sé gríðarlega öflugt og eftir því tekið innan alþjóðasamfélagsins. Hann varar einnig við okri í íslenskri ferðaþjónustu og segir það upplifun sína að nú þegar séu of margir ferðamenn yfir sumartímann á Íslandi við helstu náttúruperlur landsins.
Ítarlegt viðtal er við Pascal Heyman í Akureyri vikublaði sem kemur út á morgun.
