Hlaupaferðafyrirtækið Arctic Running stóð fyrir 3 daga hlaupaferð með leiðsögn frá Mývatni norður í Ásbyrgi í byrjun júlí. 6 hlauparar lögðu af stað frá Reykjahlíð, upp í Leirhnjúk, í Gjástykki og að Eilífsvötnum þar sem var tjaldað fyrri nóttina. Hópurinn var í fantagóðu formi og tók því marga aukakróka á leið sinni þennan dag sem endaði í 39 km. Við Eilífsvötn beið þeirra tjöld, eldhústjald og farangurinn þeirra sem hafði verið keyrður frá Reykjahlíð yfir daginn. Það viðraði vel til hlaupa þennan dag, þrátt fyrir að kalt væri (6°C) en það var skýjað yfir daginn og rigndi aðeins í hádeginu við Leirhnjúk. Talsverður snjór og skaflar voru enn á svæðinu og gerði leiðina erfiðari en ella.
Daginn eftir var hlaupið svokallað Þingeyskt þúfuhlaup frá Eilífsvötnum yfir í Vatnajökulsþjóðgarð að Dettifossi. Það þótti þægileg leið þar sem engir snjóskaflar voru á þeim hluta (í byrjun júlí). Sama dag var hlaupið frá Dettifossi eftir hádegismat, í Hafragilsundirlendi og Jökulsárgljúfrum fylgt norður að Hólmatungum og tjaldað í Vesturdal. Þar grillaði hópurinn læri og hlauparar böðuðu sig í læknum eftir 35 km. hlaupadag. Þá hafði aðeins hlýnað frá því daginn áður og mikil stemning í hópnum eins og sjá má á myndunum.
Þriðja daginn var farið í Svínadal – hlaupandi auðvitað - og svo varJökulsárgljúfrunum fylgt þar til komið var að Ásbyrgi, hlaupið var uppi á barmi byrgisins og svo niður í byrgið og endað við Botnstjörn. Í heildina var leiðin 96 km. með öllum aukakrókunum en stoppað var við skemmtilega staði til að njóta þeirra. Það stóð upp úr hjá kanadamönnunum í hópnum aðkoman að Eilífsvötnum og sögðu þeir leiðina í gegnum Gjástykki og að vötnunum þá fallegustu sem þau höfðu hlaupið yfir ævina – en hlaup eru þeirra lífstíll.
Ferðin fékk það góðar undirtektir að nú þegar er búið að staðfesta aðra álíka ferð þar sem hlaupið verður 85km á 3 dögum frá Mývatnssveit í Ásbyrgi 30.ágúst – 1.september. Leiðsögumaður leiðir hópinn í gegnum svæðið bíll flytur farangurinn milli staða svo hlauparar geta haft létta dagpoka á leiðinni. Hafið samband við info@arcticrunning.is fyrir nánari upplýsingar.
