Hjónin Ólafur Valsson og Sif Konráðsdóttir íbúar á Hólum í Öxnadal fagna því nú að í gær úrskurðaði umhverfis- og auðlindaráðherra um að kerfisáætlun Landsnets skuli sæta umhverfismati. Ógilti ráðherra þar með niðurstöðu Skipulagsstofnunar frá fyrra ári í kærumáli hjónanna.
Landsnet hefur fram til þessa ekki látið gera umhverfismat á kerfisáætlunum sínum og hefur raunar alfarið hafnað slíkri kröfu. Það kærðu hjónin Ólafur og Sif en Landsnet hefur kynnt hugmynd um að leggja í Öxnadalnum öfluga flutningslínu, Blöndulínu 3, sem fyrsta áfanga í áformum fyrirtækisins um hringtenginu virkjana um allt land.
Niðurstaða ráðuneytisins hefur það í för með sér að kerfisáætlun Landsnets hefur ekkert gildi gagnvart sveitarfélögum og almenningi fyrr en lögformlegt umhverfismat hefur farið fram á henni.
Ólafur og Sif fagna þessari niðurstöðu og telja hana stórsigur fyrir umhverfisvernd í landinu. „Ráðuneytið skýrði lög með hliðsjón af því markmiði að stuðla að sjálfbærri þróun og draga úr neikvæðum umhverfisáhrifum jafnramt því að stuðla að því að við áætlanagerð sé tekið tillit til umverfissjónarmiða. Á sama tíma vekur það umhugsun að almennir borgarar þurfi að draga öflugt fyrirtæki sem fer með opinbert vald og nýtur sérleyfis, fyrir ráðuneyti umhverfismála til að fá slíka niðurstöðu. Þá er það sorgleg staðreynd að Landsnet hafi fram að þessu ekki séð sóma sinn í að láta umhverfismat fara fram á áætlunum sínum. Hefur fyrirtækið einnig kerfisbundið skirrst við að láta gera greiningu á þeim valkosti að leggja raflínur í jarðstreng þar sem það á við. Slíkar aðstæður telja kærendur að séu m.a. fyrir hendi í Öxnadal, þar sem háspennumöstur og línuvegir myndu hafa mikil sjónræn áhrif á náttúruverndarsvæði, við bæinn Hraun og Hraundranga,“ segir í tilkynningu frá hjónunum.
Úrskurðinn telja kærendur sýna að meta verði heildstætt allar áætlanir um framkvæmdir í flutningskerfi raforku. Við það mat hlýtur trúverðugur samanburður að fara fram á þeirri leið að leggja jarðstrengi þar sem það á við á flutningsleiðinni.
Hér má sjá úrskurð umhverfis- og auðlindaráðherra í heild sinni
