Matthías Jochumsson
Afmælisnefnd Akureyrarbæjar og Minjasafnið á Akureyri bjóða upp á göngur öll fimmtudagskvöld í sumar og á morgun, fimmtudaginn 2. ágúst, verður gangan tileinkuð einu ástsælasta þjóðskáldi Íslendinga, Matthíasi Jochumssyni.
Gengið verður frá Minjasafnskirkjunni þar sem Matthías átti sín fyrstu spor á Akureyri og að Sigurhæðum, en þar bjó Matthías síðustu æviárin.
Gísli Sigurgeirsson, sagnaþulur, leiðir gönguna og fræðir göngugesti um skáldið og mannvininn Matthías Jochumsson, en líf hans var samtvinnað sögu Akureyrar.
Lagt verður af stað frá Minjasafnskirkjunni kl. 20.00 á fimmtudaginn. Gangan tekur um klukkustund og er þátttakendum að kostnaðarlausu.
