Sr. Bolli Pétur Bollason
Þönglabakkakirkja er ósýnileg kirkja. Hún var tekin ofan árið 1944. Þá var engin byggð lengur í Fjörðum og sóknarbörnin öll flutt í aðrar sóknir. Austanvert í kirkjugarðinum mótar enn fyrir grunni kirkjunnar. Þar var sungin messa sunnudaginn 27. júlí 2008. 160 sóttu þá messu. Var þá ákveðið að messað skyldi ár hvert síðasta sunnudag í júlí og verður engin breyting á því þetta árið. Þönglabakkakirkja var til forna helguð Ólafi helga og þar sem Ólafsmessa er 29.júlí ræður það messudeginum. Áhugahópur um messuhald á Þönglabakka og varðveislu Fjörðungasögu stendur að baki helgihaldi á Þönglabakka.
Þönglabakkamessa 29. Júlí 2012
Messan verður kl. 14.00. Skipið Húni mun sigla frá Akureyri með viðkomu á Grenivík og verður Steini Pje í essinu sínu. Fjöldi manns mun þiggja siglingu eða ganga frá Hvalvatnsfirði yfir í Þorgeirsfjörð. Þarna verða ættarmótsgestir, en Kussungsstaðaætt kemur saman á Lómatjörn og flestir ef ekki allir taka þátt í messunni. Valgarður Egilsson segir sögur, það mun frú Valgerður Sverrisdóttir eflaust gera líka. Arnhildur Valgarðsdóttir organisti mun stýra sönghóp, sem er skipaður fagfólki í tónlist, sem tilheyrir allt fyrrnefndri sómaætt, þar má finna söngdívur á borð við Sigríði Thorlacíus. Ófáir eru að vitja forfeðra á helgum stað, hvernig ætli sú tilfinning sé?
Fólk kemur víða að, úr öllum áttum. Þarna verður 70 manna hópur ungmenna á aldrinum 18-25 ára frá Finnlandi, Eistlandi, Þýskalandi og Íslandi, evrópsk ungmennasamskipti, verkefni styrkt af Evrópusambandinu og dvelja þau útlendu 10 daga á landinu. Hvað finnst þeim um þessa reynslu að njóta helgihalds í afskekktum firði, hlusta á fortíðarsögu úr óbyggðum? Þarna verður ferðafélagið Fjörðungur með hagyrðingin Björn Ingólfsson innanborðs og lummukaffið rómaða í skála ferðafélagsins laðar að eftir messu. Þessi stóri viðburður í einstakri umgjörð hlýtur að kalla á umfjöllun myndræna sem „orðræna,“ eða hvað? Svo messar Kristján Valur Ingólfsson vígslubiskup í Skálholti Björnsbróðir (verður hann með tábagal og mítur?) ásamt undirrituðum og fjörðurinn mun skarta sínu fegursta, þetta er á þeim árstíma, og þarna skal hljóma Næturljóð úr Fjörðum eftir Böðvar Guðmundsson rithöfund og þá er ekki hægt annað en að lygna aftur augunum. Randaflugurnar suða. Ef menn vilja upplifa stemmningu, grípa hana og leyfa öðrum að njóta hennar, sem ekki eiga þess kost að komast, þá erum við að tala um einstakt tækifæri. Guð launi ykkur áhugann, ég tala nú ekki um ef hann verður settur í framkvæmd. Sjáumst í Þönglabakka!!
Bolli Pétur Bollason
Prestur í Laufási
