Uglan, bókakaffi í Fnjóskadal opnar á morgun

Tassajara brauðin tilbúin

Á morgun, 14. júní, opnar nýtt kaffihús að Skógum í Fnjóskadal, í húsnæði gamla barnaskólans. Kaffihúsið hefur fengið nafnið Uglan og er bókakaffi, þar sem gestir geta gluggað í gamlar og nýjar bækur og tímarit og hægt er að kaupa notaðar bækur á lágu verði.

Á Uglunni verður boðið upp á hefðbundið íslenskt góðgæti í félagsskap við heimskræsingar. Þriðjudaga til fimmtudaga verður kaffihúsið opið frá klukkan tvö til sex, en um helgar verður opið fram á kvöld og þá er einnig boðið upp á kvöldverð og árbít á sunnudögum frá kl.10.

Í allt sumar verða listsýningar  og ýmis konar uppákomur og viðburðir s.s. tónleikar, sagnastundir og örnámskeið og fleira. Það er Guðrún H. Bjarnadóttir (Hadda) sem ríður á vaðið með sýningu sína sem hún nefnir „Verkkunnátta og verklag er þjóðararfur. Ber okkur að varðveita hann?“ og flytur erindi með sömu yfirskrift á opnunardaginn.

Gamli barnaskólinn Skógum var barnaskóli sveitarinnar á árunum 1916-1972 en einnig var í Skógum símstöð sveitarinnar, póstafgreiðsla, ferjustaður áður en gamla bogabrúin var byggð yfir Fnjóská, áningarstaður, þingstaður, samkomustaður og fundarstaður allt fram á þennan dag.

Allri opinberri starfsemi var hætt í Skógum eftir að símstöðin var lögð niður. Sjálfseignarstofnun um Gamla barnaskólann tók við rekstri húsnæðisins 2011 og unnið er að því að safna munum til að halda uppi minningu skólans, um leið og húsnæðið er gert aðgengilegt fyrir almenning. Kvenfélagið rak kaffihús um helgar sumarið 2011 og sjálfseignarfélagið sá um sýningarhald, en nú hefur UGLAN tekið við því hlutverki.

Kaffihúsið er rekið í skólastofunni/borðsalnum, en það rými sem áður var svefnskáli er nú nýtt fyrir listsýningar, námskeið og aðra viðburði. Þar er einnig úrval bóka, handverks og listmuna.

Húsfreyja Uglunnar, Valgerður Bjarnadóttir, segir áherslu lagða á að nýta eftir föngum innlent hráefni og sem mest úr héraði, vistvænt og árstíðabundið. Heimabakað brauð og kökur,  heimagerðar kæfur, sultur og safar verða í boði auk þess sem boðið verður upp á úrvalskaffi og -te, uppáhellt og rjúkandi. „Gestir geta valið seyði úr staðbundnum jurtum, blóðbergi, birki, vallhumli, lyngi svo eitthvað sé nefnt, auk brenndra og óbrenndra tejurta erlendis frá.  Á föstudögum og laugardögum verður hægt að fá matarmiklar súpur, salöt og fleiri létta rétti og á sunnudagsmorgnum er tilvalið að skella sér í sveitina og fá sér árbít, hlaðborð, pönnukökur eða eggjakökur.  Við reynum alltaf að eiga líka eitthvað gott fyrir þau sem ekki vilja eða geta borðað kjöt, fisk, mjólkurmat eða glúten“.

„Uglan býður hvorki upp á áfengi né gosdrykki, en bæði ljúffenga rabbarbarasaft og vatn, og svo er gestum velkomið að taka með sér uppáhaldsveigarnar sínar til að dreypa á með matnum,“ bætir Valgerður við.

Á góðviðrisdögum verður hægt að sitja úti við og jafnvel fá sérútbúna nestiskörfu til lautarferðar sunnan undir vegg eða í móum og skógum.

Í Skóga er um 20 mínútna akstur frá Akureyri um Víkurskarð, en tilvalið er einnig að aka, hjóla eða ganga gamla Vaðlaheiðarveginn, sem liggur í hlaðið á Skógum.

Húsfreyjan er einnig aðalkokkur Uglunnar en ýmsir gestakokkar munu heimsækja Skóga reglulega og töfra fram sína bestu rétti.

Hér má sjá myndir frá Uglunni og undirbúningi opnunarinnar