Gunn Nordheim Morstøl opnar myndlistasýningu í Mjólkurbúðinni í Listagilinu á Akureyri á morgun, laugardaginn 18.ágúst kl. 14.
Það sem er sérstakt við þessa opnun er að ekki er komið í ljós hvaða myndir verða á sýningunni því fyrir sýninguna, sem ber heitið Delicious, vann Gunn sérstaklega myndaröð sem átti að standa yfir 150 ára afmæli Akureyrarbæjar. Myndröðin fór með pósti þann 2.ágúst frá heimabæ Gunn, Åndalsnes en er enn ókomin til Akureyrar. Dagrún Matthíasdóttir, eigandi Mjólkurbúðarinnar, hefur verið í sambandi við starfsmenn Póstsins sem leitað hafa sýningarinnar en ekkert hefur til hennar spurst síðan hún var skráð í tollafgreiðslu í Osló þann 8. ágúst.
„Ég er auðvitað búin að bíða alla vikuna og vona að pósturinn hringi í mig og segi mér að verkin séu fundin, en Gunn lét þetta ekki slá sig út af laginu og tók í snarheitum til verk í aðra sýningu sem hengd verður upp í fyrramálið“ segir Dagrún og bætir því við að upphengitíminn verði knappur því Gunn flýgur til landsins í kvöld og til Akureyrar með fyrsta flugi í fyrramálið. „Við verðum á síðustu stundu með hamar og nagla á lofti að klára upphenginguna upp úr hádegi á morgun,“ segir Dagrún og hlær, „svona getur alltaf komið upp og það er ekkert annað að gera en að taka þessu með jafnaðargeði og reyna að vinna úr því sem best.
„Gunn er að leysa þetta mjög vel. Það veltur allt á listamanninum sjálfum, hvað hann er tilbúinn til að gera í svona aðstöðu, það er annað hvort að hrökkva eða stökkva,“ segir Dagrún og bætir því við að það hefði auðvitað verið mjög leiðinlegt ef sjálfri afmælissýningunni hefði verið alveg aflýst.
„Þetta verður ok, ég er með málverk í vinnslu og ég tek þau með í flug og vona bara að upphenging nái fyrir auglýstan opnunartíma” segir Gunn en hún lendir í Keflavík í kvöld. Hún hefur meiri áhyggjur af listaverkum Dagrúnar Matthíasdóttur sem eiga að skila sér heim í sömu sendingu eftir sýningu í Noregi. Gunn er jákvæð þrátt fyrir óvissuna með listaverkin og vonar hún að pakkinn skili sér á meðan á dvöl hennar stendur svo enn er ekki útilokað að myndröðin hennar nái á veggi Mjólkurbúðarinnar meðan sýningin stendur yfir.
Um Gunn Nordheim Morstøl:
Gunn Nordheim Morstøl lærði myndlist í Gerlesborgsskolan i Bohuslän í Svíþjóð og starfar ásamt myndlistinni sem kennari í Åndalsnes Ungdomsskole. Hún heldur einnig utan um listviðburðinn “Kunst I Natur” sem er árlegur listahátíð (fjellfestival) í fjöllunum í kringum heimabæ Gunn, þar sem listamenn koma víða að og taka þátt. Gunn hefur verið öflug í sýningarhaldi í Noregi og einnig sýnt verk sín víða um heim, m.a. í New York, Ísrael, Japan, Rússlandi, Spáni, Englandi, Frakklandi og hér á Íslandi. Gunn hefur hlotið menningarverðlaun Rauma Kommunes kulturpris 2003 og hlaut einnig verðlaunin ”Jerusalemprint 2000,” sem voru veitt í tengslum við alþjóðleg grafíklistasýningu í Ísrael 1998. Gunn hefur áður komið til Íslands og tók þá þátt í stórri samsýningu Staðfugl-Farfugl í Eyjarfirði 2008 þar sem útiskúlptúr var hennar framlag auk þess sem hún hélt námskeið fyrir börn og fyrirlestur ásamt sænsku listakonunni Helen Molin í Deiglunni á Akureyri.
Sýning Gunn Nordheim Morstøl stendur yfir Akureyrarvöku sem nú er 150 ára afmælishátíð Akureyrarbæjar og henni lýkur 2.september. Opið laugardaga og sunnudaga kl.14-17 og eftir samkomulagi – Allir velkomnir.
